• El calendariu afita les feches de la evaluación, les pruebes estraordinaries y les actividaes de preparación de la EBAU

La Conseyería d'Educación publicó les instrucciones poles que s'establez el calendariu del final de cursu de segundu de Bachilleratu, que se mandó güei a les direcciones de los centros. Les clases van terminar el 12 de mayu pa, de siguío, celebrar la evaluación ordinaria, de manera que l'alumnáu tenga marxe pa preparar la prueba d'Evaluación de Bachilleratu p’Accesu a la Universidá (EBAU).

Amás del calendariu de finalización de les clases, tamién se marquen les feches d'evaluación, les actividaes de preparación de la EBAU y les pruebes estraordinaries de segundu de Bachilleratu.

Asina, tres la finalización del periodu lectivu ordinariu, la evaluación final va realizase ente los díes 13 y 16 de mayu y les calificaciones van entregase’l 17. L'alumnáu que supere'l cursu va poder preparar les pruebes d'accesu a la Universidá, establecíes na so primer convocatoria pa los díes 8, 9 y 10 de xunu.

Desque se conozan los resultaos de la evaluación ordinaria, les pruebes estraordinaries van desenvolvese hasta'l 14 de xunu y la so evaluación va llevase a cabu mientres esi mesmu día y el 15 de xunu, con cuenta de que l’alumnáu que les supere pueda realizar la prueba d’EBAU na convocatoria de los díes 6, 7 y 8 de xunetu.

Los centros educativos van caltener l'actividá docente dende'l 18 de mayu hasta'l 24 de xunu pa tol alumnáu: tanto pa estudiantes que preparen la EBAU como pa quien tengan de presentase a la convocatoria estraordinaria de Bachilleratu.

La ellaboración de los calendarios específicos de les actividaes del final de cursu de segundu de Bachilleratu ye potestá de los equipos directivos de cada centru educativu.

 El documentu coles instrucciones pue consultase nel portal d’Educastur.