Categories Navigation

Categories Navigation

El plan de caza de les reserves rexonales inclúi midíes estraordinaries pa la vixilancia sanitaria de la fauna montesa

06/04/2022
  • El Principáu enllarga la temporada hasta'l tercer domingu de 2023 n'árees del Sueve, Somiedu y Casu onde pueden producise focos de tuberculosis bovina
  • Mediu Rural destina anguaño 950.000 euros al pagu del canon cinexéticu a los conceyos y va convocar llueu les subvenciones pa les sociedaes que xestionen los cotos

 
El Boletín Oficial del Principáu (Bopa) publica güei el plan de caza de les reserves rexonales para la temporada 2022-2023 que, ente otres novedaes, amplía los plazos de captura en delles zones  coles mires d'ameyorar les polítiques de vixilancia sanitaria de la fauna montesa, más concretamente, los posibles focos de tuberculosis bovina.
 
Asina, n'árees de la reserva del Sueve, Somiedu y Casu amplíase'l calendariu cinexéticu hasta'l tercer domingu de 2023 p'amenorgar la probabilidá d'apaición d'estos focos.
 
Amás, el plan inclúi yá los cambeos del decretu de caza, que promueve una custodia afayadiza del territoriu y ameyora les condiciones de seguridá de les caceríes. Pela so parte, el númberu de permisos nes reserves caltiénse nun númberu asemeyáu al de temporaes anteriores.
 

El plan de caza de les reserves rexonales puede consultase nel siguiente enllaz del Bopa: https://cutt.ly/LFtSxaS

Paralelamente, el Principáu destina anguaño 950.000 euros al pagu del canon cinexéticu a los conceyos nos que s'alluguen estes reserves rexonales. Los 19 conceyos beneficiaos son los siguientes: Ayer, Balmonte, Cangas, Casu, Degaña, Ibias, Ponga, Sobrescobiu, L.lena, Proaza, Somiedu, Caravia, Colunga, Parres, Piloña, Quirós, Tameza, Ribeseya y Teberga.

Les reserves rexonales de caza son territorios con un réxime cinexéticu especial, xestionaes directamente pol Principáu, según lo establecío na Llei de Caza, que tamién plantega'l pagu d'una cantidá a los conceyos qu'apurren terrén a estos espacios. Esa cantidá establezla l'Executivu autonómicu en función de parámetros como la superficie o la riqueza cinexética de la reserva. Los fondos que perciben les entidaes locales por esti conceptu revísense y actualicen cada añu.

 Coles mesmes, en sofitu d'esta actividá, el Principáu va publicar nes próximes selmanes la convocatoria de subvenciones pa les sociedaes que xestionen los cotos rexonales, dotada con 157.000 euros. D'esta miente, consolídase la medría esperimentada'l pasáu añu, cuando se triplicó la cantidá destinada a esta llinia.