​​​​​​​

• El documentu, ellaboráu cola collaboración de la Fundación Secretariáu Xitanu, va guiar les polítiques de la Conseyería de Derechos Sociales vinculaes a esti colectivu, que va n'aumentu y supera yá les 11.500 persones n'Asturies

El Gobiernu del Principáu presentó güei la primer Estratexa asturiana pa la promoción social de la población xitana (2021-2023), una ferramienta que pretende acabar cola discriminación que tovía sufre esti colectivu, formáu por más de 11.500 persones, y algamar la so plena inclusión.
 
La conseyera de Derechos Sociales y Bienestar, Melania Álvarez, y el director territorial de la Fundación Secretariáu Xitanu n'Asturies, Víctor García, destacaron el calter integral, interdisciplinar, interdepartamental y collaborativu de la estratexa, en que'l so diseñu participaron distintos departamentos del Principáu, alministraciones locales, la Universidá d'Uviéu, entidaes asociatives y la mesma población xitana, al traviés de dellos grupos de trabayu.
 
El documentu pretende dar coherencia a les distintes acciones empobinaes a la promoción social de la población xitana. Pa ello, encara un diagnósticu detalláu de la situación d'esta comunidá n'Asturies, con referencies sobre los distintos ámbitos de la vida: educación, empléu, vivienda, salú, participación, igualdá de tratu y infancia, y una perspectiva tresversal de xéneru. Amás, analiza les sos necesidaes, los recursos disponibles y les llimitaciones qu'afecten al grupu.
 
El testu, alliniáu col marcu européu y les estratexes nacionales, estructúrase en 12 llinies estratéxiques d'actuación, con diversos oxetivos pa caúna d'elles, desglosados en midíes concretes. Hai delles acciones prioritaries, definíes como clave, y otres complementaries. Amás, establécense modelos rellacionales que faigan posibles iniciatives coordinaes, y créase una estructura d'análisis pal siguimientu de les polítiques.
 
La estratexa pue consultase nel enllaz https://cutt.ly/WFtZyk7.