Categories Navigation

Categories Navigation

Mediu Ambiente axudica en 2,1 millones el saniamientu y depuración d’Anlleo y Sante, en Navia

08/04/2022
  • El proyectu, con un plazu d'execución de 20 meses, va beneficiar a 420 habitantes

La Conseyería d'Alministración Autonómica, Mediu Ambiente y Cambéu Climáticu axudicó en 2.173.182 euros les obres de saniamientu y depuración de les poblaciones d’Anlleo y Sante, en Navia. L'actuación va tener un plazu d'execución de 20 meses y va beneficiar a 420 habitantes.

El proyectu, que se llicitó en 2.600.434 euros, va consistir na execución de dellos trabayos que van dexar recoyer les agües residuales doméstiques pa conduciles pal so tratamientu, primero de ser vertíes al mediu natural, hasta una depuradora nueva. La instalación va basase nun sistema de biodiscos y va cuntar con un desbaste inicial, dos llinies de tratamientu colos sos correspondientes tanques de sedimentación primaria p'almacenar los fangos, un reactor biolóxicu de biodiscos, un decantador secundariu y una bomba de recirculación d'agües pa los procesos de nitrificación y desnitrificación.

Les obres contemplen la construcción de nueve quilómetros de colectores que van funcionar por gravedá y la instalación de 272 pozos de rexistru. Amás, prevése executar les acometíes a 85 viviendes d’Anlleo y 35 de Sante.

L'actuación va cuntar cola cofinanciación del Fondu Européu de Desenvolvimientu Rexonal (Feder) y va incluyir l'arreglu de tolos espacios afectaos polos trabayos.