• La rede d’equipamientos del Principáu convoca espectáculos de música y teatru, cine, esposiciones, talleres y visites guiaes, ente otres propuestes

La rede d’equipamientos dependiente directa o orgánicamente de la Conseyería de Cultura, Política Llingüística y Turismu ufierta un programa ampliu d’actividaes dirixíu a tolos públicos a lo llargo de la Selmana Santa, que va poder disfrutase en trece centros repartíos per tola xeografía asturiana.

Xunto a la música, el cine, el teatru y les esposiciones inclúyense decenes d’acciones diseñaes pa los más pequeños, como talleres divulgativos, visites guiaes, campamentos y cuntacuentos. Los museos, biblioteques y espacios culturales xestionaos pola conseyería van cuntar con una mayor frecuencia d’horarios estos díes y van aumentar les sos actividaes pal públicu familiar.

Con esta ufierta integral, articulada alredor d’una amplia variedá temática y de formatos, búscase satisfaer a toa mena de visitantes y espectadores. Les más de les actividaes previstes son de calter gratuitu y en toes elles van respetase los conseyos de les autoridaes sanitaries pa garantizar la seguranza.

La rede d’equipamientos del Principáu dexa averar a tola ciudadanía y a quien visiten la comunidá los díes festivos una programación atractiva qu’asitia la cultura asturiana como activu turísticu primordial de la comunidá.

Anexo de programación (pdf 38 Kb)​​​​​​​ (n'español)