• El Principáu regula con esta norma los llabores de los órganos implicaos pa garantizar un sistema integráu de previsión de riesgos y protección civil
• El testu adapta los instrumentos pa intervenir énte situaciones derivaes del desenvolvimientu industrial y tecnolóxicu, el cambéu climáticu y les dinámiques poblacionales actuales

El Gobiernu d’Asturies aprobó esta selmana’l proyectu de llei de xestión d’emerxencies, que s’afái a los tipos nuevos de catástrofes, regula de forma coordinada los llabores de los órganos implicaos y afita l’ámbitu de collaboración cola sociedá pa garantizar un sistema integráu de previsión de riesgos y protección civil.

Esti sistema integráu estructúrase en dos ámbitos indixebrables. Per una parte, la xestión de riesgos, que compriende la so identificación y evaluación, les midíes estructurales de seguranza y la planificación; per otra, la xestión de les emerxencies, qu’incluye l’activación de los planes, la coordinación de recursos nes actuaciones y la recuperación posterior. El propósitu de la norma ye garantizar la disponibilidá permanente d’un operativu eficaz na coordinación, dirección y control d’emerxencies y catástrofes.

Nesti sentíu, el testu afáise a les tipoloxíes nueves de riesgu de catástrofes: les derivaes del desenvolvimientu industrial y tecnolóxicu, les rellacionaes coles condiciones meteorolóxiques y el cambéu climáticu (llenes, quemes forestales, etcétera) y les vinculaes a les dinámiques poblacionales actuales.

Dalgunes de les principales aportaciones del proyectu de llei, qu’agora va unviase a la Xunta Xeneral pa la so tramitación, son estes:

• Creación de la rede autonómica d’información sobre protección civil, un rexistru rexonal de datos sobre emerxencies y catástrofes asemeyada al del Estáu.
• Desenvolvimientu reglamentariu de les llinies esenciales del voluntariáu de protección civil.
• Réxime d’inspección y d’infracciones y sanciones, inexistente anguaño.
• Reconocencia de la condición d’autoridá pública pa los empleaos qu’intervienen nestos llabores, d’acordies cola consideración de funcionariu públicu prevista na Llei d’Empléu Públicu.
• Establezse la necesidá d’informe previu y vinculante del Conseyu de Protección Civil na aprobación d’instrumentos d’ordenación del territoriu.

Otres aportaciones que nun son novedoses, pero que sí s’incluyen na norma de manera clarificadora, son estes:

• Conferir a l’autoridá competente la capacidá p’adoptar midíes qu’afecten a derechos fundamentales como confinamientos, evacuaciones, restricción d’accesu o llimitación d’usu, en determinaes situaciones de catástrofe.
• Autorízase l’usu d’ingresos por contribuciones especiales pa financiar los gastos corrientes y non solo inversiones.
• Establezse la posibilidá d’integración nel Serviciu d’Emerxencies del Principáu de los cuerpos d’estinción de quemes d’Uviéu y Xixón.

A lo llargo de la tramitación de la norma, la Conseyería de Presidencia dio cumplimientu de los principios de tresparencia y favoreció la participación activa de los sectores afectaos. El testu tamién se sometió a información pública y a l’audiencia de la Federación Asturiana de Conceyos, el Conseyu de Protección Civil y les conseyeríes d’Alministración Autonómica, Mediu Ambiente y Cambéu Climáticu; Mediu Rural y Cohesión Territorial; Salú, Facienda y Educación.

​​​​​​​