Mediu Ambiente invierte 568.110 euros nel saniamientu d'Argañosa, Reconco y La Peral, n'Illas
-
El proyectu, que cunta con financiación del fondu Feder, va beneficiar a un centenar d'habitantes de les trés localidaes
Les obres de saniamientu de les poblaciones d'Argañosa, Reconco y La Peral, asitiaes nel conceyu d'Illas, van rematar a mediaos del 2023, según adelantó güei’l vicepresidente y conseyeru d'Alministración Autonómica, Mediu Ambiente y Cambéu Climáticu, Juan Cofiño, mientres la visita que realizó a los trabayos, nos que se van invertir 568.110 euros. L'actuación, empecipiada en payares del 2021, tien financiación del Fondu Européu de Desenvolvimientu Rexonal (Feder) y va beneficiar a un centenar d'habitantes.
El proyectu consiste na execución de les actuaciones necesaries pa recoyer les agües residuales de les trés poblaciones y tresportales a la rede de colectores de Calavero, que cunta con una estación depuradora. Esta intervención incluye la creación d'una rede formada por trés colectores xenerales que conecten con otros secundarios pa encauzar los vertíos de les viviendes cercanes a les sos traces.
Nel casu d'Argañosa, el colector principal va tener 1.154 metros de tubería y 27 pozos de rexistru. La obra incorpora tamién 5 colectores secundarios con 20 pozos de rexistru y 22 acometíes domiciliaries.
En Reconco, la tubería va sumar 946 metros de llargor y van executase 26 pozos de rexistru. Amás, va haber un colector secundariu, 4 pozos de rexistru y 7 acometíes.
Pela so parte, les obres en La Peral van dexar recoyer les agües de les viviendes asitiaes na zona noroeste de la localidá, una y bones el restu cunta cola so propia rede de saniamientu, que comunica col sistema xeneral del conceyu en La Caizuela. El llargor de la tubería va ser de 875 metros y van construyise 20 pozos de rexistru. La rede va disponer, amás, de 2 colectores secundarios, 7 pozos de rexistru y otres tantes acometíes domiciliaries.
Les obres van concluyir cola pavimentación de viales y la reposición de los servicios y terrenos afectaos.
Depuración de Piñella
Otra manera, Cofiño anunció que’l so departamentu va disponer n'agostu del proyectu que va definir les actuaciones necesaries pa depurar les agües residuales de Piñella, que nun dispón d'esti tratamientu.
Apocayá contratóse l'asistencia técnica pa la redacción del proyectu constructivu, desque s’analizaron les alternatives posibles pa la recoyida, conducción y, si fuera'l casu, tratamientu de los vertíos de les viviendes.
Na actualidá, Piñella cunta con una rede de saniamientu que confluye nun colector xeneral perteneciente al sistema xeneral de saniamientu d'Avilés. Sicasí, al norte de la localidá allúguense un conxuntu de viviendes que nun tán sirvíes por dicha rede, polo que les sos agües residuales doméstiques viértense al mediu natural ensin el tratamientu afayadizu.
