Categories Navigation

Categories Navigation

El Gobiernu d'Asturies invierte 325.000 euros na meyora de les cuenques salmoneres y de los centros ictioxénicos

11/04/2022
  • Los trabayos lleváronse a cabu nos calces principales, en pequeños ríos costeros y nes instalaciones de contaxe, captura y precintaxe xestionaes pol Principáu
  • Mediu Natural pon en marcha un sistema d'información xeográfica de cada tramu fluvial y anueva la señalización

El Gobiernu d'Asturies realizó obres de meyora nes cuenques salmoneres y nos centros ictioxénicos de titularidá autonómica que supunxeron una inversión de 325.000 euros. Estes actuaciones formen parte del programa pa la protección de los ecosistemes acuáticos y la meyora de l'accesibilidá pa la pesca fluvial, dotáu con 2,4 millones pal periodu 2021-2023.

Los trabayos lleváronse a cabu nos calces principales (Cares, Sella, Piloña, Narcea-Nalón, Esva, Porcía y Eo), mesmo qu’en pequeños ríos costeros, onde se retiró la basura, esaniciáronse especies invasores y acometiéronse roces. A lo último, procedióse a l’adecuación ambiental de más de 50 quilómetros de márxenes fluviales.

Amás, en collaboración coles sociedaes de pescadores, identificáronse 175 puntos nos que foi necesario retirar torgues, árboles y residuos, de la que se desapexaron más de 30 escales piscícoles qu'evitaben una permeabilidá afayadiza de los calces.

Tamién s'acometieron obres d'adecuación de les instalaciones de contaxe, captura y precintaxe que xestiona'l Principáu nel Esva, Niserias, Cañu y La Rodriga. Nesta última van instalase paneles interpretativos sobre'l ciclu biolóxicu del salmón atlánticu, de cuenta que va sirvir como puntu d'educación ambiental. Asina mesmo, van anovase unes quinientes señales informatives en tolos ríos asturianos.

Otra de les iniciatives que se punxeron en marcha ye un sistema d'información xeográfica que va dexar recoyer indicadores de cada tramu fluvial, lo que va resultar de gran importancia pal desenvolvimientu de la estratexa d'ordenación de los recursos acuáticos continentales.



Planes de xestión

Paralelamente, la Conseyería de Mediu Rural y Cohesión Territorial, en collaboración la Confederación Hidrográfica del Cantábricu, la Universidá d'Uviéu y el Grupu d'Acción Local del baxu Nalón, empecipió la redacción de los planes de xestión de cuenques, que van facilitar la ordenación integral de los recursos piscícoles.

El conseyeru de Mediu Rural y Cohesión Territorial, Alejandro Calvo, y el director xeneral del Mediu Natural y Planificación Rural, David Villar, visitaron güei’l centru de precintaxe de La Rodriga, en Salas. Darréu, visitaron el monesteriu de Corniana, onde se celebra la puya del campanu, actividá declarada como Fiesta d'Interés Turísticu Rexonal.

Una de les novedaes d'anguaño, que se recueye de forma escepcional nes normes, ye que los pescadores van poder capturar un exemplar más del cupu establecíu, siempre que donen vivo unu de los salmones pa los programes de repoblación avalaos pola Alministración autonómica. Esta iniciativa tien por oxetivu'l refuerzu de la población de salmónidos.


Audios del director general del Medio Natural y Planificación Rural, David Villar (mp3 850 Kb)