Categories Navigation

Categories Navigation

El Principáu y el Conceyu d'Uviéu firmen un protocolu p’ameyorar la circulación na rotonda de Luis Oliver

11/04/2022

de izquierda a derecha, el alcalde de Oviedo, Alfredo Canteli, y el consejero de Medio Rural y Cohesión Territorial, Alejandro Calvo, firman el protocolo de colaboración​​​​​​​

  • Esta iniciativa va dexar entainar les salíes y incorporaciones a La Ciudá Naranco y l'autovía AS-II
  • La Conseyería de Mediu Rural y Cohesión Territorial yá llicitó, por cuasi 60.000 euros, el contratu d'asistencia técnica pa la redacción del proyectu

El Principáu y el Conceyu d'Uviéu firmaron güei un protocolu de collaboración p'ameyorar la circulación y desconxestionar el tráficu na redolada de la rotonda de Luis Oliver y la cai Ernesto Winter. El conseyeru de Mediu Rural y Cohesión Territorial, Alejandro Calvo, y l'alcalde d'Uviéu, Alfredo Canteli, soscribieron l'alcuerdu, nel que cada parte asume los trabayos qu’habrá realizar, al haber viales de titularidá de les dos alministraciones.

En virtú del alcuerdu, el Gobiernu d'Asturies comprométese a construyir el ramal de xiru directu dende l'autovía AS-II, en sentíu ascendente, escontra la cai Ernesto Winter. D'esta miente, el Principáu asume los trabayos necesarios p'acometer el ramal: estudios, redacción y aprobación del proyectu técnicu, análisis complementarios y procedimientu de contratación, dirección y execución de les obres. Tamién va sufragar el costu económicu de too esti procesu.

Esta actuación supón una meyora importante nel tráficu d’accesu al barriu uvieín de La Ciudá Naranco, y compleméntase, amás, colos trabayos que l'Alministrador d'Infraestructures Ferroviaries (Adif) ta realizando na cai de Nicolás Soria, otru de los principales accesos a esta zona d'Uviéu.

Mediu Rural y Cohesión Territorial yá foi dando pasos p'avanzar na execución de la meyora en Luis Oliver, al sacar a llicitación, por 57.739 euros, el contratu d'asistencia técnica pa la redacción del proyectu. El Principáu plantega una solución que pasa pola construcción d'un ramal perbaxo de la vía d’Adif, por aciu la disposición d'un marcu fincáu, con sección abonda p'allugar dos carriles de 3,50 metros d'anchor, arcén interior d'un metru y esterior de 2,50. Tamién va ser necesario analizar el drenaxe y instalar señalización nueva, abalizamientu y barreres pa garantizar la seguridá y establecer la ordenación nueva del tráficu.

Pela so parte, el Conceyu d'Uviéu comprométese a construyir el ramal de xiru directu dende Ernesto Winter Blanco, que conecta en sentíu descendente cola cai Jesús Saénz de Miera, y a sufragar tamién los costos que se deriven de los estudios, redacción y aprobación del proyectu, contratación, dirección y execución de la obra.

Yá col conveniu soscritu, cada alministración va siguir, de forma independiente, colos procedimientos necesarios p'avanzar na execución de les obres. Esti alcuerdu, que tien una vixencia de cuatro años, prorrogable hasta los seis, supón un pasu importante p'afitar la collaboración institucional ente'l Principáu y el Conceyu d'Uviéu, facilitando'l desenvolvimientu de proyectos conxuntos que beneficien a la ciudadanía.

Amás de facilitar la integración de l'autovía AS-II na ciudá d'Uviéu, el Principáu trabaya nuna solución técnica qu'ameyore l'enllaz d'esta infraestructura cola autovía del Cantábricu (A-8) na redolada de Roces, en Xixón. Esta última actuación ye frutu d'un protocolu soscritu ente'l Principáu y el Ministeriu de Tresportes, Movilidá y Axenda Urbana, al traviés del cual el Gobiernu central comprométese a executar l'enllaz de Carbayeda ente l'AS-II y l'autopista ‘Y’, que'l so proyectu yá salió a llicitación por unos 700.000 euros.


​​​​​​​ Audio del consejero de Medio Rural y Cohesión Territorial, Alejandro Calvo (mp3 751 Kb)​​​​​​​ (n'español)