• L’espaciu protexíu suma un centru nuevu d’información a la so rede col allugáu nel conxuntu d’A Palloza, en Santantolín
• Mediu Rural, en coordinación col Conceyu de Cangas del Narcea, rehabilita la carretera de Mual a Las Tablizas

El Principáu realizó meyores nes infraestructures d’atención a los visitantes y na rede de comunicaciones del Parque Natural de Fontes del Narcea, Degaña y Ibias por valor de más de 50.000 euros. Los trabayos dexaron incorporar un centru nuevu d’información y la rehabilitación de la carretera de Mual a Las Tablizas.

El director xeneral del Mediu Natural y Planificación Rural, David Villar, informó güei sobre estes actuaciones nuna visita a dos de los conceyos de la zona, na que tuvo acompañáu pola alcaldesa d’Ibias, Gemma Álvarez, y el rexidor de Cangas del Narcea, José Víctor Fernández.

La rede de centros d’información del parque natural incorpora un equipamientu nuevu, l’allugáu nel conxuntu d’A Palloza, en Santantolín, que se xunta a los de Courias, Oubachu, Las Tablizas y Zarréu. L’Executivu invirtió más de 25.000 euros nel acondicionamientu d’esti espaciu, propiedá de la entidá local.

El centru va abrir les puertes el miércoles, día 13, y tola ponte de Selmana Santa. A partir de la selmana que vien y hasta xunu, va poder visitase les fines de selmana y festivos. Nos meses de xunetu y agostu, y en collaboración col Conceyu d’Ibias, va permanecer abiertu tolos díes, y a partir del 1 de setiembre y hasta el 31 de xineru, de llunes a domingu, sacante los miércoles.

Cola incorporación del centru de Santantolín, anguaño son yá 22 los equipamientos de la Rede Natural d’Asturies (RENA). Estos espacios apurren una visión integral del patrimoniu natural, de la que valen de puntu d’alcuentru p’actividaes d’educación ambiental. Nos periodos lectivos, la RENA recibe visites de grupos d’escolinos coles que se busca concenciar sobre la importancia de les árees protexíes, difundir la biodiversidá como seña d’identidá y cavilgar sobre les posibilidaes de futuru lligaes a los recursos naturales locales.

​​​​​​​

Comunicaciones más segures

Dientro del espaciu protexíu, tamién se llevó a cabu la meyora de la carretera de Mual a Las Tablizas. Esta actuación, executada en coordinación col Conceyu de Cangas del Narcea, centróse na construcción de los sistemes de drenaxe y canalización d’agua, que provocaben afontanamientos; l’afitamientu d’elementos de contención pa evitar argayos, l’arreglu de barandielles y la reconstrucción de murios de piedra en Mual.

La inversión, que superó los 25.000 euros, enmárcase nel programa de meyora de l’accesibilidá a los llugares turísticos de más cayida de visitantes, que quier combinar la seguranza cola integración de les actuaciones na redolada natural.

La vía que comunica Mual col centru d’interpretación de Las Tablizas, na Reserva Integral de Munieḷḷos, val d’entrada a ún de los enclaves más singulares de la RENA. Amás, ye en sí mesma una ruta interpretativa qu’ufierta un averamientu al aprovechamientu tradicional sostenible de los recursos naturales nun espaciu de monte. Esti valle d’El Ríu Munieḷḷos, onde se dexa la pesca deportiva de trucha autóctona, ta enllenu d’enclaves etnográficos de munchu valor.