• Los trabayos en Les Arriondes, que tienen un plazu de 23 meses, van amenorgar el riesgu d'inundaciones na capital parraguesa

La Conseyería d'Alministración Autonómica, Mediu Ambiente y Cambéu Climáticu axudicó en 2.520.577 euros les obres incluyíes na segunda fase del proyectu p'amenorgar el riesgu d'inundaciones en Les Arriondes, nel conceyu de Parres, con un plazu d'execución de 23 meses.

L'actuación, que salió a llicitación por 3.219.12 euros, ta financiada pol Fondu Européu de Desenvolvimientu Rexonal (Feder) y plantega delles intervenciones sobre los ríos Chicu y Piloña y la so redolada.

Les principales obres nel Chicu van consistir na ampliación de la sección de desaguadoriu. Con esti fin, va construyise un murete llonxitudinal y un montículu realzáu de tierra pa la protección contra les aveníes na marxe derecha, concretamente ente l'Hotel Ribera del Chicu y el pasu de la carretera a Bode. Tamién se va alzar el camín de ribera nesta marxe, ente la vía d'accesu a esta localidá y la confluencia del Chicu col Sella. Amás, van executase meyores nel colector existente, asina como nos drenaxes de les instalaciones de la piragüera municipal y del pasu sol ferrocarril de la carretera a Bode. De la mesma manera, va sustituyise'l pasu de riegu baxo la carretera AS-260, paralela al ríu, y van construyise redes de drenaxe.

no que fai a El Ríu Piloña, va alzase la rasante del terrén na zona del parque de La Llera, onde tamién va facese lo propio col tableru de la pasarela piatonal p'ameyorar la capacidá de desaguadoriu, lo que va repercutir nun menor nivel d'agua nes zones colindantes col ríu. Per otra parte, van protexese por aciu un muriu la piscina y el camping allugaos nesta área.

Anguaño, los ríos Piloña y Chicu, al so pasu pela capital parraguesa, presenten tramos con capacidaes de desaguadoriu inferiores a les necesaries en casu d'aveníes, una situación que s'acentúa pola presencia de problemes puntuales, tanto nel mesmu calce como nes márxenes. Los trabayos previstos pretenden prevenir daños y evitar los problemes que causen les crecíes.

Estes actuaciones tán incluyíes na segunda fase del proyectu pa prevenir inundaciones en Les Arriondes recoyíu nel conveniu soscritu ente'l Ministeriu pa la Transición Ecolóxica y el Retu Demográficu, el Principáu y el Conceyu de Parres, que va movilizar más de 17 millones pa garantizar la protección de la capital parraguesa énte les crecíes.