Categories Navigation

Categories Navigation

El Principáu y la Delegación del Gobiernu intensifiquen el plan de vixilancia activáu pola muerte d’aves en peligru de desaniciase

12/04/2022

 

  • El dispositivu, nel que tamién participen el Seprona y delles entidaes que collaboren cola Alministración, focalízase na zona suroriental d’Asturies 
  • Los organismos implicaos investiguen la muerte de trés frangüesos y dos utres            

El Principáu y la Delegación del Gobiernu intensificaron el dispositivu de vixilancia puestu en marcha pola muerte de dellos exemplares d’aves en peligru de desaniciase. Na última selmana alcontráronse los restos de trés frangüesos y dos utres na zona suroriental de la comunidá.
Pa coordinar actuaciones, güei celebróse una xunta na sede de la Delegación del Gobiernu ente los distintos axentes implicaos, cola mira de tratar esta problemática de manera conxunta. La comisión técnica fixo un siguimientu de la estratexa nacional contra l’usu illegal de cebos envelenaos nel mediu natural. 
Na última selmana, efectivos de la Guardería del Mediu Natural, del Seprona y de la Fundación pal Caltenimientu del Frangüesu alcontraron muertos dellos exemplares d’aves en peligru de desaniciase, a los que-yos tán realizando les preceptives necropsies y análisis pa resolver les causes de la mortalidá. Hasta agora, en dos de los frangüesos atopaos detectáronse sustancies tóxiques. 
Énte esta situación, reforzáronse los dispositivos de vixilancia en zones concretes, onde tamién se realizaron batíes con perros especializaos na detección de velenu. Amás, activóse la Rede Centinela de Velenos del Principáu, onde tamién participa personal del Institutu Mistu d’Investigación en Biodiversidá del Conseyu Superior d’Investigaciones Científiques (CSIC). La rede encárgase de monitorizar l’actividá d’exemplares d’aves de presa y necrófagues, al traviés de dispositivos GPS, lo que dexa analizar el so comportamientu y localización con muncha precisión. 
Les autoridaes recuerden que la muerte d’especies catalogaes en peligru de desaniciase ta tipificada na llexislación como delitu grave, con multes que van de los 3.001 a los 200.000 euros, y supón penes de prisión.
Na xunta celebrada esta mañana participaron, amás de representantes de les dos alministraciones implicaes, responsables de la Guardería del Mediu Natural, del Seprona, del CSIC-Universidá d’Uviéu, de la Fundación pal Caltenimientu del Frangüesu, de Seo-Birdlife y de Grefa.