• Mediu Rural invirtió 20.000 euros nesta actuación, que dexó duplicar la capacidá del parking y incluyó l’acondicionamientu del área recreativa anexa

El Principáu concluyó les obres d'ampliación del aparcamientu que da serviciu al monumentu natural del escobiu de Las Xanas, nel conceyu de Santu Adrianu. La conseyería de Mediu Rural y Cohesión Territorial destinó 20.000 euros a esta intervención nun espaciu que forma parte a la Rede Natural d'Asturies (RENA).

El director xeneral del Mediu Natural y Planificación Rural, David Villar, visitó güei la zona acompañáu pola alcaldesa de Santu Adrianu, Elvira Menéndez.

Les obres d'ampliación del aparcamientu dexaron habilitar y delimitar un espaciu de 850 metros cuadraos con capacidá pa 25 vehículos, de manera que se doblen les places que'l parking tenía hasta agora. Los trabayos incluyeron tamién la reposición del moblame y l'acondicionamientu de la área recreativa que ta al pie del estacionamientu. Esta actuación contribúi a la meyora de la dotación de servicios d’una zona con bien de visitantes.

L'escobiu de Les Xanes ta asitiáu nel so mayor parte nel conceyu de Santo Adriano y ye una de les rutes más populares d'Asturies. El trazáu d'esti monumentu natural, qu'escurre por una sienda tallada na roca, forma una foz fluvial ablucante de más de dos kilómetros de llargor. Esti espaciu da abellu a múltiples especies d'aves rupícolas –que se críen na peña como l'andarina montés, el raitán moru, la chova del picu coloráu y del picu mariellu o les utres. Amás, el ríu de Les Xanes ye l'hábitat de llóndrigues y otres especies d'interés.

Na páxina de la RENA puede consultase la información sobro esti monumentu natural: https://cutt.ly/NFRN14f

Audio con declaraciones del director general del Medio Natural, David Villar (mp3 568 Kb)​​​​​​​