• La plaza, que va tar adscrita al IES Xovellanos de Xixón, tien calter itinerante y va cubrir les necesidaes d’estudiantes del mesmu institutu y d’otros centros del área

La Conseyería d'Educación va abrir una nueva aula d'acoyida ya inmersión llingüística que va tar adscrita al Institutu d'Educación Secundaria (IES) Xovellanos de Xixón, va tener calter itinerante y va responder a les necesidaes del alumnáu d'incorporación tardía al sistema educativu del propiu centru y otros de la área educativa. Esta decisión reflexa la voluntá del Gobiernu d'Asturies de reforzar el sistema d'enseñanza pa responder con plenes garantíes a la llegada del alumnáu ucraniano que se vio obligáu a dexar so casa pol conflictu bélicu, anque l'aula va dar respuesta tamién a otres nacionalidaes. Anguaño, yá s'escolarizaron n'Asturies 159 estudiantes procedentes d'Ucrania.

L'aula adscrita al IES Xovellanos, que se va poner en marcha depués de les vacaciones de Selmana Santa, súmase a les cinco yá esistentes, que cunten con 10 docentes y con un ámbitu d'actuación que cubre 42 conceyos.

El mapa de les aules d'inmersión queda distribuyíu de la siguiente manera:

• IES Calderón de la Barca e IES Jovellanos, en Xixón. Hasta agora, con dos docentes pa Primaria y una pa la ESO, a la que va haber que sumar el profesorado del aula nueva.
• IES Alfonso II e IES Pando, n’Uviéu. Los dos centros tienen otros tantos docentes pa Primaria y pa la ESO.
• IES La Magdalena, n’Avilés, con una profesora pa Primaria y otra pa la ESO.
• IES Cuenca del Nalón, en Llangréu, con una profesora pa Primaria y pa la ESO.

Nos niveles de Primaria, Educación cunta con profesoráu itinerante qu'ufierta sofitu nos centros que lu soliciten. Na ESO, ye l'alumnáu'l que se mueve al aula d'inmersión más cercana del so centru d'orixe. Les aules tienen tamién un serviciu d'asesoramientu p’aquellos centros que, pola mor de la distancia, nun pueden aportar a esti recursu.

Los docentes de les aules d'inmersión llingüística destinen anguaño les dos hores que dedicaben a llabores de coordinación interna al asesoramientu directu y sobre’l terrén de los centros educativos que lu precisen. Dende la mesma conseyería, la Sección d'Orientación tamién ufierta asistencia a los centros que lu reclamen.

Midíes pa l’acoyida del alumnáu ucranianu

La Conseyería d'Educación punxo en marcha apocayá una serie de midíes pa facilitar l'acoyida tanto sociollingüística como emocional del alumnáu procedente d'Ucrania. Ente elles, la creación d'un espaciu específicu pa los estudiantes ucranianos, dientro de la páxina web de les aules d'inmersión llingüística, denominada Acoyida, que puede consultase nel siguiente enllaz: https://cutt.ly/8DHZhOE.

El Principáu tamién activó visites de los equipos docentes de les aules d'inmersión a aquellos centros con más menores refuxaos pa da-yos asesoramientu. De manera complementaria, ufiértase un corréu electrónicu de la mesma conseyería dende'l que se van responder toles duldes que puedan surdir nel procesu d'acoyida.

Igualmente, ufiértase un serviciu d'interpretación telefónica a los centros pa la xestión de trámites alministrativos con families que desconozan l'idioma.

El sistema educativu asturianu cunta esti cursu con un refuerzu extra de personal especializáu en Pedagoxía Terapéutica (PT) y Audición y Llinguaxe (AL) y tamién se crearon unidaes d'acompañamientu, integraes por personal d'orientación y profesoráu técnico de servicios a la comunidá. Per otru llau, los centros incluyíos nel programa PROA+ tamién disponen de personal complementario.