• La Conseyería de Ciencia destina 1,6 millones a un programa nel que participen más d'un centenar de científicos y 18 empreses 
• Biosensores pa detectar toxines, meyores pa la producción del quesu de Cabrales, hidroxeles pa l'artrosis o sistemes de calor y enerxía más eficientes son dalgunes de les iniciatives

El Gobiernu d'Asturies financia con 1,6 millones una ventena de proyectos d'investigación vinculaos a la meyora de la salú, agroalimentación, materiales nuevos y enerxía llimpia. La Conseyería de Ciencia, Innovación y Universidá punxo en marcha una llinia nueva d'ayudes de collaboración públicu-privada de la que yá se beneficiaron 18 empreses, xunto con grupos científicos y centros d'investigación.
 
Nanopartícules pa detectar toxines nel pexe, sistemes más eficientes pa calecer viviendes, materiales nuevos pa implantes, molécules terapéutiques procedentes de la regaliz, probióticos pa reforzar l'exerciciu físicu, o meyora de la calidá na producción del quesu de Cabrales son solo delles llinies d'investigación del programa Proyectos d'I+D+i en rede.
 
La iniciativa, xestionada pola Fundación pal fomentu n'Asturies de la Investigación Científica Aplicada y la Tecnoloxía (Ficyt), estiéndese hasta 2023 y tien como oxetivu'l trabayu conxuntu ente equipos científicos y empreses pa potenciar la tresferencia de conocencia.
 
Más d'un centenar d'investigadores y técnicos d'I+D+i participen nel programa, que se punxo en marcha a finales del añu pasáu, y al que'l texíu productivu contribuye con daqué más de 340.000 euros. Los proyectos tán lideraos por equipos de la Universidá d'Uviéu, el Serida, centros del CSIC y del Institutu d'Investigación Sanitaria (ISPA), en contactu con compañíes de distintos sectores, tanto grandes empreses como pymes. De siguío, cítense por sectores:
 

Agroalimentación:

• Análisis del microbioma del quesu de Cabrales y de los ambientes d'ellaboración y maduración pa la meyora de la so calidá y seguridá.
• Recuperación del patrimoniu xenéticu apícola con un muestréu nos territorios del Cordal Cantábricu onde vive l'osu. L'oxetivu ye identificar ecotipos locales d'abeyes y sentar les bases pa la recuperación d'esti patrimoniu xenéticu.

Salú:

• Biomarcadores nuevos de glaucoma, una enfermedá ocular neurodexenerativa asociada a la edá y una de les principales causes de ceguera irreversible.
• Estudiu de molécules nueves con actividá terapéutica al traviés del ácidu glicirretínico, una sustancia que s'atopa na regaliz.
• Desenvolvimientu de biosensores pa la detección rápida y portátil d'una toxina (la ciaguatoxina) producida por microalgues, que s'atropa en pexes y que ye capaz de producir alteraciones nel ser humanu derivaes del so consumu.
• Nanomateriales con fines biomédicos que puedan utilizase n'aplicaciones como control de lliberación de fármacos, control metabólicu o estudios d'imaxe biomédica.
• Estudiu sobre mecanismos de meyora de tratamientos de l'artrosis al traviés d’hidroxeles proteicos que promuevan la rexeneración del cartílagu articular de forma que s'eviten procesos inflamatorios.
• Hemoderivaos nuevos pal tratamientu d'enfermedaes neurodexeneratives menguando los efectos secundarios adversos.
• Desenvolvimientu d'anticuerpos frente al coláxenu XIalfa1 estracelular de los carcinomes invasivos humanos.
• Desenvolvimientu de probióticos pa meyora de l'actividá física y el rendimientu deportivu que contribuyen al avieyamientu saludable.
• Desenvolvimientu de materiales cerámicos nuevos nanocompuestos biocompatibles pa la fabricación d'implantes y prótesis.

Enerxíes anovables y materiales nuevos:

• Intelixencia artificial pa predicir la perda d'eficiencia de les centrales eóliques por corrosión o abrasión, condiciones topográfiques, meteorolóxiques, etc.
• Producción de materiales biodegradables con característiques asemeyaes a les del plásticu convencional a partir d'aceites vexetales residuales.
• Diseñu de disipadores de calor de xeneración nueva que redunden nuna meyora de la eficiencia enerxética pa construcciones modulares.
• Desenvolvimientu d'un sistema novedosu de calefacción radiante basáu nel empléu de tintes conductores d'eletricidá y calor.
• Estratexes de meyora de la eficiencia enerxética na molienda de materies primes pa la producción de cementu.
• Usu de metodoloxíes nueves pa pieces metáliques fabricaes por aciu pulvimetalurxa (partiendo de polvos finos) con aplicación al sector del automóvil.
• Desenvolvimientu de materiales sostenibles pa la eliminación de metales pesaos n'agües industriales y de minería.
• Soluciones nueves d'almacenamientu d'enerxía en bateríes de Litiu-Ion y xeneración fotovoltaica.
• Estudiu sobre meyores na productividá d'impresión en 3D por aciu la tecnoloxía LBPF (Laser Bed Power Fusion).