Categories Navigation

Categories Navigation

La Comisión Europea asitia Asturies ente les trés árees comunitaries con potencial mayor pa desenvolver proyectos d’hidróxenu verde

18/04/2022
  • Esti órganu considera que’l Principáu, Estonia y la rexón francesa d’Auvernia-Rodano-Alpes son territorios con una concentración singular d’iniciatives vinculaes al H2 renovable
  • L’Alianza Europea del Hidróxenu Verde va prestar asesoramientu especializáu p’acelerar el desenvolvimientu de los planes

La Comisión Europea (CE) considera qu'Asturies ye, con Estonia y la rexón francesa de Auvernia-Rodano-Alpes, ún de los territorios comunitarios con más potencial pal desenvolvimientu del hidróxenu verde a gran escala nos años vinientes. L'organismu européu, al traviés de la Clean Hydrogen Alliance (Alianza Europea del Hidróxenu Verde), escoyó'l Principáu como una de los trés primeres árees con una concentración singular de proyectos venceyaos al H2 renovable.

Esta consideración surde n'analizando una cartera de más de 750 proyectos a nivel européu, 43 d'ellos impulsaos dende Asturies, que van dende la producción d'hidróxenu llimpiu hasta'l so usu na industria, la movilidá, la enerxía o'l sector de la edificación.

Depués de la publicación de la cartera de proyectos a finales del pasáu añu, l'órganu executivu de la Unión Europea (UE) suscribió alcuerdos col Bancu Européu d'Inversiones (BEI) y con EIT InnoEnergy p'asesorar individualmente a los promotores de proyectos sobre posibilidaes de financiación y estratexes pal desenvolvimientu de les iniciatives.

Naquelles zones como Asturies nes que s'identificó una concentración singular de proyectos, la Comisión Europea desenvolvió un mecanismu específicu de sofitu denomináu tHrive.

L'Alianza Europea d'Hidróxenu Llimpiu foi impulsada pola Comisión Europea en xunetu de 2020 pa sofitar la Estratexa d'Hidróxenu de la UE, coles mires d'aguiyar l'esplegue de la producción y l'usu d'hidróxenu llimpiu a gran escala y el desenvolvimientu de tola cadena de valor. Anguaño cunta con más de 1.500 miembros.


European Clean Hydrogen Alliance (pdf 806 Kb)
Audio con declaraciones de la directora general de Energía, Minería y Reactivación, Belarmina Diaz (mp3 944 Kb)