Categories Navigation

Categories Navigation

El Gobiernu d’Asturies prevé cuadruplicar esti añu’l númberu de viviendes públiques con teleasistencia domiciliaria intelixente

18/04/2022
  • Anguaño esfruten d'esti serviciu 21 inquilinos de Vipasa en Xixón, Uviéu, Llangréu, Mieres, Llanes y Avilés, y ta previsto rematar 2022 con 80 cases atendíes

 
La empresa Vipasa prevé cuadruplicar anguaño'l númberu de viviendes públiques con teleasistencia domiciliaria intelixente. Anguaño, esfruten d'esti serviciu 21 inquilinos partíos polos conceyos de Xixón, Uviéu, Mieres, Llanes, Avilés y Llangréu, qu'afirmen sentise más seguros y acompañaos. La previsión de la compañía pública ye rematar l'añu con 80 llares atendíos y algamar los 150 nun bieniu.
 
Esti mes, Vipasa y Cruz Roja llevaron la teleasistencia domiciliaria al conceyu de Llangréu. Una docena d'inquilinos de les viviendes públiques del barriu de San Jose de Lada, na so mayoría muyeres mayores de 70 años, participaron nel taller impartíu pa presentar el funcionamientu y les ventayes d'esti serviciu, que la compañía pública ufierta de forma gratuita.
 
Gracies a una serie de sensores que s'asitien en distintes estancies de los llares ye posible detectar situaciones anómales o prever accidentes. Si'l sistema percibe daqué irregular, ensin necesidá de pulsiar nengún botón, llanza un avisu automáticu al centru d'atención de Cruz Bermeya pa verificar qué asocede y movilizar, en casu necesariu, a los servicios d'emerxencia y familiares o persones de contactu. Amás, inclúyese un pulsiador pa que la persona pueda charrar, sentise acompañada o avisar si precisa cualquier cosa.
 
Vipasa y Cruz Roja probaron nos últimos años esti serviciu de forma esperimental y, una vez comprobada la so eficacia, decidióse implantalo de forma xeneralizada p’asistir a 150 inquilinos del parque públicu. El períodu de prueba ufiertó resultaos concluyentes, cuidao que’l 93% de les persones que se beneficiaron d'esta ferramienta aseguren sentise más segures, tranquiles y menos soles, y el 100% considera “bien positiva” esta iniciativa.
 
Esti programa tien por oxetu ameyorar la calidá de vida de les persones mayores que viven soles para apurri-yos tranquilidá, fomentar el autocuidáu, detectar situaciones de riesgu y actuar énte casos d'emerxencia sanitaria o social
 
Cabe destacar que la metá de les persones inquilines del parque públicu de vivienda tienen un contratu de más de 15 años, un datu que reflexa la estabilidá de los arrendamientos y, coles mesmes, el progresivu avieyamientu de los sos titulares.
 
Les respuestes qu'ufierta Vipasa énte esti fechu van dende pequeñes obres d'accesibilidá nel interior de les viviendes -como les sustituciones de bañeres por platos de ducha, nes que s'invirtieron 72.250 euros l'añu pasáu- hasta los cambeos de vivienda por barreres nel esterior del edificiu o en zones comunes y la puesta en marcha de servicios d'atención a mayores como la teleasistencia domiciliaria.


Audio de la consejera de Derechos Sociales y Bienestar, Melania Álvarez (mp3 503 Kb)