Categories Navigation

Categories Navigation

Educación incorpora 10 centros públicos nuevos a los PROA+, destinaos a facilitar l’éxitu escolar del alumnáu vulnerable

18/04/2022
  • La decisión de la conseyería, que se consultó col ministeriu, va dexar que xuban a 89 los contratos firmaos 
  • La midida va beneficiar a cerca de 1.800 estudiantes más


La Conseyería d’Educación incorpora diez centros públicos más a los programes PROA+, destinaos a facilitar l’éxitu escolar del alumnáu, especialmente aquel que s’atopa en situación de vulnerabilidá educativa. D’esta manera, el Gobiernu d’Asturies va firmar en total 89 contratos PROA+, 79 de ellos na rede pública y 10 na enseñanza concertada.

La decisión consultóse col Ministeriu d’Educación y Formación Profesional p’aprovechar un remanente de la primer anualidá del programa, que se punxo en marcha en xineru. L’incrementu del cupu inicial recomendáu pol propio Gobierno central de 79 a 89 centros v dexar que les actuaciones lleguen a cerca de 1.800 estudiantes más.

La conseyería mantuvo’l mesmu procedimientu de selección que na primer fase y siguió l’orde de centros resultante na axudicación, incorporando a los diez siguientes.

Los nuevos centros que firmarán los PROA+ son:

-    CP Alcalde Próspero Martínez (Riosa)
-    CP Pumarín (Xixón)
-    IES Escultor Juan de Villanueva (Siero)
-    IES Rosario Acuña (Xixón)
-    CP Jovellanos (A Veiga)
-    CP Los Campos (Xixón)
-    CP Lugo de Llanera (Llanera)
-    CP Elena Sánchez Tamargo (Llaviana)
-    CRA La Marina (Villaviciosa)
-    IES Río Nora (Siero)

Estos centros que s’incorporen van cuntar con personal de refuerzu a xornada completa hasta xunu. Como los otros seleccionados, a partir de setiembre y nos dos cursos más que va durar el programa, el refuerzu va ser d'una media xornada. Tamién van disponer d'una dotación económica proporcional, en función del so alumnáu.

La Conseyería d'Educación va realizar una inversión que va algamar los 9 millones al tratase de programes que se van allargar trés cursos, hasta'l 2023/2024.

El PROA+ ye una actuación que se desenvuelve nel marcu 21 del Mecanismu de Recuperación y Resiliencia, y qu'implica la contratación de personal. Los programes beneficien tantu a la rede pública como a la concertada y nellos prima la ruralidad como criteriu. L'oxetivu fundamental ye configurar un sistema educativu más equitativo y más xustu.

Pa la selección de los centros que desenvuelven los PROA+, Educación atendió a criterios como que tuvieren siquier un 30% d'alumnáu vulnerable, que s’asitien nel ámbitu rural o en zones deprimíes o con gran dispersión de la población. Nel casu de los públicos, utilizóse l'índiz socioeconómico, sopesáu pol criteriu de ruralidá, como criteriu d'ordenación pa ellaborar la llista definitiva de beneficiarios. Nos concertaos valoróse'l proyectu presentáu. 

El destinatariu últimu de les actividaes de los PROA+ ye l'alumnáu d'Infantil, Primaria, Secundaria y Bachilleratu más vulnerable educativamente nun sentíu global: dende estudiantes con necesidaes asistenciales, escolares o socioeducativas a aquellos otros que presenten altes capacidaes, dificultaes específiques d'aprendizaxe o que s'incorporaron de forma tardida al sistema. La so finalidá ye baltar les barreres que condicionen les posibilidaes d'ésitu. 

Per otru llau, la Conseyería d'Educación ta peracabando una convocatoria de proyectos d'innovación con recursos económicos propios del Principáu a la que van poder acceder centros que quedaron fora del PROA+.