Categories Navigation

Categories Navigation

El Gobiernu d'Asturies aportuna en reclamar un tratamientu específicu pa les industries con un consumu intensivu d'enerxía

20/04/2022
  • L'Executivu considera qu'estes empreses han tener un réxime singular qu'embriva l'impactu del aumentu de los precios de la eletricidá y del gas nos sos costos de producción​​​​​​​
  • El Principáu repite la necesidá de garantizar la máxima compensación polos costos d'emisiones indirectes de CO2

El Gobiernu d'Asturies aportuna en reclamar un tratamientu específicu para les industries con un consumu intensivu d'enerxía, tres la publicación güei nel Boletín Oficial del Estáu (BOE) de la resolución de 7 d'abril de la Secretaría Xeneral d'Industria y de la Pequeña y Mediana Empresa pola que se revisa'l cociente ente consumu y valor añadíu brutu pa optar a la categoría de consumidor electrointensivu.

El Principáu valora cualquier cambéu normativu o midida que dexe un aforru de los costos enerxéticos pa empreses y particulares nel contestu actual, como les incluyíes nel plan nacional de respuesta a les consecuencies de la guerra d'Ucrania, qu'inclúi un paquete d'ayudes que supera los 500 millones pa empreses intensives n'enerxía. Nesti sentíu, considera que la resolución publicada agora nel BOE puede beneficiar a empreses asturianes y solliviar la so factura enerxética.

Sicasí, l'Executivu aportuna en que les industries altamente consumidores d'enerxía han tener un tratamientu específicu qu'embriva l'impactu que tán sufriendo de resultes de los aumentos escepcionalmente altos de los precios del gas y d’electridá.

Asina, xulga necesaria l'adopción de midíes singulares pa la gran industria consumidora d'enerxía, eletricidá y gas, como la siderurxa, la industria química, l'aluminiu o la fabricación de cinc, ente otres.

Amás, el Gobiernu d'Asturies repite la importancia de garantizar la más elevada compensación por costos d'emisiones indirectes de CO2, faciendo usu del 25% de los ingresos por puya de derechos d'emisión de gases d'efectu invernaderu, el porcentaxe máximu permitíu pola Comisión Europea.