Categories Navigation

Categories Navigation

El conseyu de la rede de Parques Nacionales informa favorablemente el nuevu plan de xestión de los Picos d'Europa

20/04/2022

reunión telemática del Consejo de la Red de Parques Nacionales​​​​​​​

  • L'organismu ratificó güei’l documentu, qu'agora s'unviará a les trés comunidaes qu'aporten terrenos al espaciu protexíu pa siguir cola so tramitación
  • La norma establez les bases pa garantizar una coexistencia sostenible ente distintos usos y prima les actividaes tradicionales
  • Los nuevos criterios pa la xestión de subvenciones van tener en cuenta la existencia de núcleos rurales na contorna lo que va suponer una medra del 10% na repartida de les ayudes

El conseyu de la Rede de Parques Nacionales informó favorablemente’l l Plan Rector d'Usu y Xestión (PRUG) del Parque Nacional de los Picos d'Europa. L'órganu ratificó güei’l documentu, qu'agora s'unviará a les trés comunidaes que conformen l'espaciu protexíu pa la so tramitación como decretu.

El nuevu plan, que va ser el preséu pa la xestión ordinaria del parque, establez les bases pa una coexistencia sostenible ente distintos usos, primando les actividaes tradicionales que modelaron el so paisaxe únicu.

Tamién recueye criterios específicos pa l'adaptación al cambéu global y el caltenimientu de valores naturales y etnográficos, mesmo que directrices pa la xestión d'usu públicu y les actividaes tradicionales y nueves propuestes pal desenvolvimientu socioeconómicu y la participación ciudadana.

Ente los aspectos más destacaos, que van redundar na meyora de la cohesión de la redolada, figura una detallada normativa en relación coles actividaes compatibles y permitíes, nes que s'enmarquen la mayoría de los usos agroganaderos tradicionales. Amás, dexa suxetes a réxime d'intervención alministrativa aquelles más delicaes, que van poder realizase por aciu una declaración responsable previa, lo que supón entainar los trámites.

Na xunta telemática del conseyu de la rede, na que participó'l director xeneral del Mediu Natural y Planificación Rural, David Villar, tamién s'aprobaron nuevos criterios pa la territorialización de subvenciones. Asina, reconozse como factor diferencial la existencia de núcleos rurales dientro del espaciu protexíu, daqué qu'estrema a Picos del restu de parques de la rede, y que va suponer una medra del 10% na repartida de les ayudes.


Audio del director general del Medio Natural y Planificación Rural, David Villar (mp3 594 Kb)