Categories Navigation

Categories Navigation

El Principáu refuercia’l so apoyu estructural a les esplotaciones ganaderes familiares y sostenibles pol so calter estratéxicu

21/04/2022

de izquierda a derecha, la directora general de Ganadería y Sanidad Animal, Rocío Huerta; el secretario general de Agricultura y Alimentación del Ministerio de Agricultura, Pesca y Alimentación, Fernando Miranda, y la directora general de Desarrollo Rural y Agroalimentación, Begoña López.

  • El Plan de Desenvolvimientu Rural dispón de 32 millones de la PAC con criterios adaptaos al modelu agroganaderu d’Asturies
  • Les subvenciones rellacionaes cola ganadería estensiva, como les lligaes a zones de monte o a la Rede Natura 2000, consoliden l’aumentu tan fuerte del añu pasáu
  • El Gobiernu d’Asturies va caltener l’ayuda estructural al sector y los mecanismos escepcionales énte situaciones de crisis

El Gobiernu d’Asturies refuercia’l so compromisu y apoyu estructural a les esplotaciones ganaderes familiares y sostenibles, un sector estratéxicu pal Principáu. D’esta manera, nel marcu del Plan de Desenvolvimientu Rural, van destinase 32 millones del segundu pegollu de la Política Agraria Común (PAC) a ayudes con criterios adaptaos al modelu agroganaderu de la comunidá.

El conseyeru de Mediu Rural y Cohesión Territorial, Alejandro Calvo, destacó güei que les subvenciones a la ganadería estensiva consoliden l’aumentu tan fuerte de la última campaña. Los aumentos más significativos tán rellacionaos coles zones de monte con dificultaes naturales (102,7 %) y a la Rede Natura 2000 (49,25 %).

Calvo tamién señaló que l’autorización efectiva de la campaña de la PAC 2022 fixo posible movilizar 96 millones como garantía financiera pa que les entidaes bancaries seyan quién a adelantar el 90 % de los pagos a agricultores y ganaderos. Esto va poder complementase, pa la campaña de la sema de forraxe, con un anticipu de creitu de circulante a 12 meses pa tolos gastos, incluyíos carburante y plásticu. “Son midíes d’interés especial pal nuestru sector lacteu, que nesti momentu tien d’afrontar la xuba de precios de grana, fertilizante y carburante”, precisó.

El Gobiernu d’Asturies tamién entainó colos trabayos pa l’aplicación de la llei de la cadena alimentaria, que va dexar avanzar nel apoyu estructural al sector, estableciendo rellaciones xustes ente los trés esllabones. La Conseyería va presentar esti mes los índices sectoriales oxetivos que puen ser vinculantes, adelantando asina los tiempos previstos nel calendariu d’aplicación de la norma.

Amás de les polítiques estructurales pal sector, tamién s’articularon midíes coxunturales lligaes a la xuba de precios de la materia prima derivada de la invasión rusa d’Ucraína. Nesti sentíu, l’Executivu yá unvió a la Xunta Xeneral un proyectu de llei pa suspender temporalmente delles tases del sector ganaderu y agrícola.

El conseyeru tamién punxo en valor l’esfuerciu del Gobiernu d’España p’apoyar al sector énte les consecuencies económiques derivaes de la guerra, cola activación d’un paquete d’ayudes directes pa los sectores agrariu y pesqueru que suma 430 millones, ente les de calter estatal y les financiaes con fondos europeos. D’esta cantidá, yá s’aprobó un bloque específicu de 169 millones pal sector productor de lleche, de los que 124 son pa productores de lleche de vaca. Tamién se consignaron 68,18 pal sector pesqueru. Los 193,4 millones restantes disponen d’una propuesta de distribución que tien una incidencia especial no vacuno de carne.

Alejandro Calvo participó nes IV Xornaes Pegaos a la Tierra. El mediu rural na coxuntura d’una guerra, onde aseguró que’l Principáu va siguir reforciando l’apoyu estructural al sector y tolos mecanismos disponibles énte situaciones de crisis. Na xornada tamién intervinieron como ponentes el secretariu xeneral d’Agricultura y Alimentación del Ministeriu d’Agricultura, Pesca y Alimentación, Fernando Miranda, y les directores xenerales de Ganadería y Sanidá Animal, Rocío Huerta, y de Desenvolvimientu Rural y Agroalimentación, Begoña López.