Categories Navigation

Categories Navigation

El Principáu recibe cuasi 800 solicitúes d’ayuda pa la convocatoria 2022 del programa Leader, dotada con 16,5 millones

21/04/2022

  • Del total de proyectos presentaos, 609 son d’empreses, 108 d’entidades locales y 67 d’organizaciones ensin ánimu d’arriquecimientu
  • Estes subvenciones, cofinanciaes al traviés del fondu Feader, fomenten la competitividá, impulsen un desenvolvimientu territorial equilibráu y creen empléu

 

El Principáu recibió 784 solicitúes d’ayudes a la convocatoria 2022 del programa Leader, dotada con 16,5 millones. De la partida total, 13.000.000 d’euros son pa empreses privaes, 3.000.000 pa entidaes llocales y 500.000 pa organizaciones ensin ánimu d’arriquecimientu.

Estes subvenciones van dirixíes a persones y organismos qu’opten por entamar y impulsen proyectos empobinaos a crear empléu, riqueza y fixar población nel mediu rural. Del total d’iniciatives presentaes, 609 correspuenden a empreses privaes, 108 a entidaes locales y 67 a organizaciones ensin ánimu d’arriquecimientu.

La Conseyería de Mediu Rural y Cohesión Territorial xestiona’l programa Leader en coordinación colos once grupos de desenvolvimientu rural que trabayen n’Asturies y abarquen cuasimente tol territoriu. El númberu de proyectos recibíos por grupu ye esti:

  • Nalón de Riba: 45.
  • Narcea de Riba-Munieḷḷos: 59.
  • Nalón de Baxo: 52.
  • Centru d’Asturies Periurbanu (Adicap): 40.
  • Comarca del Camín Real de la Mesa: 88.
  • Comarca de la Sidra: 77.
  • Monte Central d’Asturies: 71.
  • Navia-Porcía: 64.
  • Oriente d’Asturies: 136.
  • Comarca Ozcos-Eo: 60.
  • Valle del Ese-Entecabos: 92.

Les ayudes del programa Leader tán cofinanciaes pola Unión Europea al traviés del Fondu Européu de Desenvolvimientu Rural (Feader). El so oxetivu ye fomentar la competitividá de l’agricultura, garantizar la xestión sostenible de los recursos naturales y l’acción pol clima, y llograr un desenvolvimientu territorial equilibráu, con atención especial a la creación de riqueza y empléu nel mediu rural.

El Principáu moviliza na actualidá cuasi 44 millones al traviés d’estes subvenciones. Asina, na convocatoria postrera, actualmente n’execución, aprobáronse 631 proyectos, a los que se destinen 22.684.304 d’euros. Del total, 429 correspuenden a empreses privaes, 142 a entidaes locales y 60 a organizaciones ensin ánimu d’arriquecimientu.