Categories Navigation

Categories Navigation

Educación va contribuyir con hasta 150.000 euros por cada unidá pa esparder la rede municipal d’escueles pal alumnáu de 0 a 3 años

21/04/2022

 
​​​​​​​​​​​​​​

  • La Conseyería presenta a los Conceyos les ayudes, que cubren obra nueva y actuaciones de rehabilitación y ampliación

  • La convocatoria da prioridá na valoración a la población de 1 y 2 años, l’allugamientu de los centros n’árees rurales y en zones de riesgu de probitú y la mengua de llistes d’espera

 

La convocatoria da prioridá na valoración a la población de 1 y 2 años, l’allugamientu de los centros n’árees rurales y en zones de riesgu de probitú y la mengua de llistes d’espera

La Conseyería d’Educación presentó güei a los Conceyos les bases nueves poles que va rexise la concesión d’ayudes destinaes a la creación de places nueves pa la etapa de 0 a 3 años. Esta convocatoria, enmarcada nel Plan de Recuperación, Tresformación y Resiliencia de la Unión Europea, propón contribuciones d’hasta 150.000 euros por cada unidá nueva pa estender la rede de centros, formada na actualidá por 73 escueles en 43 conceyos.

Nuna reunión telemática con representantes de la Federación Asturiana de Conceyos (FACC), la conseyera Lydia Espina y la directora xeneral de Planificación y Infraestructures Educatives, María Elena Arango, detallaron los aspectos principales de la convocatoria, qu’ufierta subvenciones en réxime de concurrencia competitiva pa la inversión n’obres y equipamientos, amás d’ayudes directes pa la financiación de places nueves.

El Programa d’impulsu d’escolarización nel primer ciclu d’Educación Infantil contempla tres modalidaes d’ayudes:

  • Pa obres de construcción d’un edificiu nuevu o pa la rehabilitación integral d’un inmueble cola mira de destinalu a escuela de 0 a 3, la cantidá de la subvención pue algamar los 150.000 euros por unidá.
  • Pa l’ampliación esterior d’aules n’edificios yá creaos, cola mira de destinales a escuela de 0 a 3 años, les ayudes tienen un tope máximu de 90.000 euros por cada unidá.
  • Pa obres interiores d’adaptación de centros yá en funcionamientu que quieran destinar parte del edificiu a escuela de 0 a 3 años, les ayudes al-gamen un tope máximu de 70.000 euros por unidá nueva.

El programa contempla tamién ayudes pal equipamientu interior o moblame d’hasta 60.000 euros por centru educativu.

 

Población infantil, árees rurales y zones de riesgu de probitú

Al respective de los criterios de valoración, el programa da prioridá a la población de 1 y 2 años, la mengua de llistes d’espera y l’allugamientu de los centros n’árees rurales o en zones con riesgu de probitú.

La renta neta media por llar tamién va ser un indicador d’importancia a la hora d’analizar les solicitúes, porque va priorizase l’allugamientu de les escueles en zones en riesgu de probitú o esclusión social.

El creitu asignáu pola Conferencia Sectorial d’Educación a Asturies pa la creación de 1.300 places nel ciclu de 0 a 3 años ye de 13,3 millones nun plazu qu’abarca hasta setiembre del 2024.

La conseyera d’Educación recordó que la estensión d’esta rede “ye un oxetivu prioritariu qu’hai que facer pente medies d’un sistema de trabayu coordináu colos Conceyos”. Espina aporfió na voluntá del so departamentu de siguir afianzando estos centros “fundamentalmente nes comarques rurales y ensin escaecer les zones de densidá mayor de población, cola mira de menguar llistes d’espera”.​​​​​