Categories Navigation

Categories Navigation

El Gobiernu d’Asturies destina anguaño 4,7 millones más pa impulsar la modernización y rentabilidá de los productos pesqueros

22/04/2022

Un momento del encuentro​​​​​​​

  • L’aumentu d’un 50 % del presupuestu de la Dirección Xeneral de Pesca Marítima va facer posible desenvolver les llinies d’acción prioritaries recoyíes na estratexa pal sector
  • Les ayudes a la incorporación de xente mozo medren en 200.000 euros y algamen el mediu millón

El Gobiernu d’Asturies va destinar 4,7 millones más anguaño a impulsar la modernización y rentabilidá de los productos del sector pesqueru. L’aumentu del 50 % del presupuestu de la Dirección Xeneral de Pesca Marítima va facer posible desenvolver les llinies prioritaries na Estratexa pal Sector Pesqueru d’Asturies 2021-2030.

El responsable d’esta área, Francisco González, presentó güei, na reunión plenaria de Redepesca, la estratexa y los trabayos que se tán desenvolviendo pa la so aplicación. A lo llargo de la so intervención, destacó la relevancia de la convocatoria d’ayudes a la incorporación de pescadores mozos, fundamental pa impulsar el relevu xeneracional, que dispón d’una partida de 500.000 euros, 200.000 más que nel 2021. L’añu pasáu, cuatro persones moces empezaron como armadores nuevos de la flota pesquera asturiana.

González tamién adelantó que la Organización de Productos de la Pesca d’Asturies (OPPA) va disponer l’exerciciu que vien de 500.000 euros p’ameyorar la xestión sostenible y rentable de los recursos pesqueros, en concreto, pa la preparación y execución de planes de producción y comercialización.

Amás, esplicó que se ta ellaborando un informe sobre la rentabilidá de les flotes más deficitaries en posibilidaes de pesca, quier dicise, aquelles que dependen en gran midida d’especies con restricciones importantes. De la mesma manera, trabáyase p’ampliar los planes d’esplotación contra l‘oriente, pa lo que, como establez la estratexa, va incrementase’l personal técnico nos años vinientes. L’oxetivu ye aumentar la profesionalización de les estructures pesqueres y ameyorar la xestión de los recursos.

Al respective de la comercialización, González señaló que se ta avanzando en modernización, sobre manera n’enerxía renovable pa les cofraderíes, al empar que consideró que la percepción sobre l’actividá pesquera y los productos capturaos poles flotes ye cada vegada más positiva.

Na reunión tamién s’analizaron proyectos como la Estratexa Nacional d’Enerxía Renovable Marino y informóse sobre la tramitación ambiental del proyectu d’una mina d’oru en Salave.

Redepesca ye un organismu qu’engloba a representantes del Gobiernu d’Asturies, profesionales del sector, miembros de la comunidá científica de la Universidá d’Uviéu y del Institutu Oceanográficu, amás d’organizaciones conservacionistes.


Audio del director general de Pesca Marítima, Francisco González (mp3 585 Kb)​​​​​​​