Categories Navigation

Categories Navigation

El Principáu marca pa los díes 18 y 25 de xunu l'empiezu de les oposiciones al cuerpu de maestros

22/04/2022
  • La Conseyería d'Educación convoca'l procesu selectivu pal Serviciu d'Inspección, con 12 places

La Conseyería d'Educación adelantó pa los díes 18 y 25 de xunu l'empiezu de les oposiciones al cuerpu de maestros. Lo mesmo que l’añu pasáu, les dos partes de la primer prueba del procesu selectivu van separase en dos díes, debíu fundamentalmente a razones organizatives y depués de la valoración positiva del formatu por parte de los participantes nel 2021.

La llista d'opositores almitíos xube a 6.459, qu'aspiren a ocupar una de les 398 places ufiertaes. La etapa d'Infantil ye la más solicitada, con 1.871 matriculaos/es pa 107 places, siguida de la de Primaria, con 1.646 para 81. Na especialidá de Pedagoxía Terapéutica hai 845 solicitúes para 59 puestos; n'Inglés, 822 para 86; n'Educación Física, 598 para 11 places; n'Audición y Llinguaxe, 422 para 27, y en Música, 255 piticiones para 27.

Educación fixo pública va unos díes la configuración de los 89 tribunales encargaos de valorar les pruebes. Caúnu d'ellos va evaluar a una media de 70 opositores. La conseyería yá escoyó tamién los centros que se van convertir en sedes y ta actualizando'l protocolu que va regular la organización xeneral del procesu selectivu.

Oposiciones al cuerpu d'inspectores

Otra manera, el Principáu convocó les oposiciones d'accesu al cuerpu d'inspectores d'Educación, nes que s'ufierten 12 places. De la cifra total, 7 provienen de la Ufierta d'Empléu Públicu (OEP) del 2020 y les 5 restantes de la del 2021. Los docentes aspirantes habrán presentar les solicitúes primero del vienres 6 de mayu.

De les 12 places de la convocatoria, 9 van otorgase por concursu-oposición, esto ye, que tán destinaes a aquellos docentes que cumplan los requisitos xenerales de la convocatoria. Les 3 restantes van axudicase al traviés de concursu de méritos.

Desque se cierre'l plazu de solicitú y tres el periodu de reclamaciones, va publicase la llista final d'almitíos y escluyíos. A lo último, va formase'l tribunal que va desenvolver la oposición y va afitase la fecha.

Les últimes oposiciones d'accesu al cuerpu d'inspectores d'Educación daten del 2016, cuando s'ufiertaron 14 places, de les que 11 s’otorgaron por concursu-oposición y 3 por concursu de méritos. Una de les places correspondió al turnu de reserva de discapacidá.