Categories Navigation

Categories Navigation

El Principáu va impulsar la investigación sobre l’hidróxenu verde con una planta pilotu pa probar el so usu nel sector industrial

25/04/2022

: la ministra de Ciencia e Innovación, Diana Morant, y el consejero de Ciencia, Innovación y Universidad, Borja Sánchez.

​​​​​​​

  • El Gobiernu d’Asturies firmó güei’l programa d’I+D+i sobre enerxía renovable con una inversión de 6 millones
  • El conseyeru de Ciencia, Borja Sánchez, destacó qu’esti plan va ser crucial pa la transición de la industria camín d’un modelu menos contaminante

El Principáu va desenvolver una planta pilotu empobinada a probar l’usu del hidróxenu verde pa menguar emisiones de CO2 nel sector industrial. El Gobiernu d’Asturies va contribuyir d’esta manera al Plan Complementariu sobre Enerxía y Hidróxenu Renovable, presentáu güei en Puertollano (Ciudad Real), xunto a otres siete autonomíes y el Conseyu Superior d’Investigaciones Científiques (CSIC). La comunidá va disponer d’una inversión de seis millones en dos años.

El conseyeru de Ciencia, Innovación y Universidá, Borja Sánchez, que participó na firma de la declaración institucional del programa d’I+D+i, destacó l’apueste del Executivu autonómicu por convertir Asturies nun polu de referencia del hidróxenu verde.

“L’hidróxenu renovable ye fundamental pa la transición del nuestru texíu productivo camín d’un sistema muncho menos contaminante, más dixital y más resiliente”, señaló’l conseyeru. Al so paecer, “l’hidróxenu verde representa un recursu como nel so día foi’l carbón, que fixo d’Asturies una de les rexones más prósperes”.

Esti plan complementariu va movilizar 89 millones en tol país. Pela so parte, el Principáu va recibir dalgo más de 3,8 procedentes de fondos europeos del Plan de Recuperación, Tresformación y Resiliencia y va contribuyir con otros 2,1. En total, n’Asturies van invertise 6 millones.

El programa propón delles llinies d’investigación y desenvolvimientu tecnolóxicu sobre la xeneración d’hidróxenu verde, el so almacenamientu y suministru, y el so usu final en tresporte pesáu o industria. Tamién busca amenorgar la emisión de gas d’efectu ivernaderu. Amás d’Asturies, participen nesta iniciativa País Vascu, Aragón, Castiella-La Mancha, Canaries, Navarra, Estremadura y Madrid, amás del CSIC.

El Principáu va tener presencia en llinies lligaes sobre manera a la xeneración d’hidróxenu verde a temperatura baxo y al so usu industrial calteniendo les emisiones per debaxo de los topes impuestos pola Unión Europea. Nesti contestu, Ciencia va promover el desenvolvimientu d’una planta esperimental pa la realización de pruebes y la investigación sobre l’hidróxenu verde na mengua d’emisiones de CO2, pensando na so aplicación posterior al sector industrial.

El conseyeru Borja Sánchez destacó qu’esti plan va impulsar la collaboración público-privada empobinada a convertir “Asturies en polu de referencia na xeneración del hidróxenu verde”.

El programa implica la interacción ente la Universidá d’Uviéu, organismos d’investigación y empreses al traviés de proyectos collaborativos que puedan atrayer fondos de convocatories europees. Les acciones van facese con una convocatoria pública a la que van poder presentase proyectos a cada llinia d’actuación.

L’oxetivu final del plan ye modernizar la economía española y avanzar na transición escontra una economía y sociedá climáticamente neutres, sostenibles y circulares, amás d’eficientes nel usu de recursos.



Audios consejero Ciencia presentación Plan Energía e Hidrógeno Renovable (mp3 1636 Kb)​​​​​​​