• La circulación va quedar interrumpida del 25 d’abril al 15 de xunetu pa poner una fincadura de raíles y vigues tresversales na carretera
• El Principáu cunta acabar les obres anguaño, tres d’invertir 2,5 millones

La Conseyería de Mediu Rural y Cohesión Territorial va cortar al tráficu la carretera AS-331 (La Pola Siero-L’Infanzón) pa siguir coles obres de contención y estabilización de la lladera en Pión.

Desque controlada la zona na que s’orixinó l’argayu, los trabayos van siguir cola colocación d’una fincadura de raíles y vigues tresversales sobre la plataforma, llabor que requier el corte total de la vía dende’l 25 d’abril hasta’l 15 de xunetu.

La interrupción de la circulación, qu’afecta al tramu de la carretera ente los puntos quilométricos 21 y 23,5, yá ta señalizada. Les persones usuaries van poder usar como itinerariu alternativu la carretera local VV-7 (Pión-Arroes) y la nacional 632 (Ribeseya-Xixón).

El Principáu ta invirtiendo 2.499.998 euros p’asegurar la vía, onde les obres empezaron a primeros d’añu y agora entren nuna fase importante. L’actuación va facer posible afitar la plataforma ente los puntos quilométricos 21,4 y 23,2, cola construcción de dos muries de formigón y dos escolleres, el saniamientu y meyora del drenaxe, amás de la pavimentación de la superficie afectada, ente otres midíes. Estos llabores, de complexidá técnica bien grande, van acabar a lo llargo d’anguaño, en función de les condiciones meteorolóxiques.

Dientro del programa de caltenimientu de viales que tien en marcha la Conseyería de Mediu Rural y Cohesión Territorial tamién s’incluyen otres dos actuaciones na carretera La Pola Siero-L’Infanzón. La primera d’elles, con un presupuestu de 122.197 euros pa esti exerciciu y en fase de llicitación, va facer posible la meyora de dellos segmentos onde hubo fundimientos nos conceyos de Sariegu, Siero y Villaviciosa.

La segunda, que yá ta acabada, consistió na meyora de la cuneta y del drenaxe del vial de l’AS-331 nun tramu de dalgo más de dos quilómetros al pasu pel conceyu de Villaviciosa. Esta actuación supunxo una inversión de 48.097 euros.