Categories Navigation

Categories Navigation

El programa d'inversiones n'infraestructures del suroccidente va ameyorar más de 500 kilómetros de la rede viaria de la contorna

25/04/2022

​​​​​​​​​​​​ 

  • El conseyeru de Mediu Rural presentó güei a entidaes y colectivos de Cangas del Narcea’l plan que recueye actuaciones hasta 2027 con una inversión cimera a los 80 millones

El conseyeru de Mediu Rural y Cohesión Territorial, Alejandro Calvo, presentó güei en Cangas del Narcea los detalles del programa tresañal d'inversiones n'infraestructures viaries del suroccidente, qu'establez un calendariu completu pa los próximos seis exercicios, con una inversión que supera los 80 millones pa l'adecuación de 30 viales de categoría rexonal, comarcal y local, que suman más de 500 kilómetros.

Les intervenciones previstes pretenden ameyorar les prestaciones y la seguridá nos desplazamientos al traviés de los principales corredores, mesmo que la movilidá dientro de los conceyos de la contorna.

Les actuaciones, que s'estienden hasta 2027, van ser oxetu d'una revisión en 2024 p'adaptales a les necesidaes qu'alleguen nesi momentu. El Principáu reafita asina'l so apueste pol caltenimientu y conservación de la rede de carreteres de titularidá autonómica nel suroccidente.

El documentu prioriza les inversiones según la situación actual de les víes y los sos niveles d'intensidá de tráficu, y plantega obres en carreteres de los cinco conceyos suroccidentales: Ayande, Cangas, Degaña, Ibias y Tinéu.

El programa recueye una inversión añal media superior a los 12 millones y yá tien obres en llicitación por valor de más de 4. Estes últimes céntrense na meyora del AS-15 (corredor del Narcea), cola renovación de 19 kilómetros de pavimentu y el refuerzu de turries y estructures p'aumentar la seguridá.

Meyores nes dos arteries suroccidentales AS-15 y AS-14

Xuntu coles actuaciones en marcha, el Principáu va siguir invirtiendo los próximos años nel AS-15, con inversiones por valor de más de 8 millones, alternando actuaciones enfocaes al caltenimientu preventivu con meyores nos tramos túnel de Calabazos - Casares, en Tinéu, Cangas - Rengos.

Amás, el documentu recueye nuevos estudios pa la meyora d'intersecciones como l'AS-15 cola AS-215, y da prioridá a esta exa que comunica con  Tinéu y cola autovía A-63.

La otra carretera rexonal de la zona, l'AS-14, que xune Pontelinfiernu, en Cangas del Narcea, con Grandas de Salime, va recibir una inversión de 3,7 millones ente esti añu y 2026 p'acondicionar dos tramos: La Puela La Puela- Puertu d'El Palu y Berducéu- Grandas de Salime. En total, con estes dos actuaciones, van ameyorase 51 kilómetros d'esta vía que vertebra'l conceyu d'Ayande.

El programa tresañal tamién inclúi obres en 8 carreteres comarcales, 5 locales de primer orde y otres 13 locales de segundu orde nos 5 conceyos del suroccidente. Los trabayos van centrase na meyora del firme, rectificación de curves, reposición y nueves barreres de seguridá, pintáu y señalización vertical p'ameyorar la seguridá, acelerando asina'l periodu de recurrencia de los llabores de caltenimientu que se veníen realizando.

Amás, el conseyeru de Mediu Rural y Cohesión Territorial refirióse a la exa La Espina-Ponferrada y a la demanda recoyida en L'Alianza poles Infraestructures del Estáu qu'Asturies precisa. Nesti sentíu, propónse que pase a formar parte de la rede de carreteres del Estáu ya intégrese dientro del Plan Estatal d'Infraestructures Terrestres (PEIT), na so próxima revisión en 2030.

El Principáu va realizar, coles mesmes, un estudiu d'alternatives, tanto de trazáu como funcionales, qu'analice los distintos tipos de vía que la normativa actual dexa ente La Espina y la llende con Llión. Les conclusiones d'esti documentu, adaptáu a les condiciones orográfiques y medioambientales y a les intensidaes de tráficu, van permitir  disponer d'un diagnósticu que sirva de sofitu p'avanzar nes conversaciones col Ministeriu de Tresportes, Movilidá y Axenda Urbana (MITMA) pa la incorporación d'esta importante exa vertebrador nel PEIT.

Estes cuestiones y los detalles del programa espunxéronse na Casa de Cultura Palaciu d’ Omaña, de la capital canguesa, onde amás d'a les corporaciones locales de los cinco conceyos, Calvo escuchó les opiniones de distintos axentes sociales y colectivos del suroccidente, que tamién asistieron a la presentación.

El programa, con actuaciones tresañales que s'estienden hasta 2027, da respuesta a la iniciativa política impulsada polos grupos que sofitaron los actuales presupuestos autonómicos y ponse a disposición de la Xunta Xeneral pa que pueda ser aprobáu col mayor consensu políticu posible, al tratase amás d'actuaciones que superen l'horizonte temporal de l'actual llexislatura.​​​​​​

 


 Declaraciones consejero de Medio Rural y Cohesión Territorial, Alejandro Calvo (mp3: 1,5 Mb)