Categories Navigation

Categories Navigation

El Principáu pon en marcha la Rede de Normalización Llingüística pa fomentar l’usu del asturianu y l’eonaviegu

25/04/2022
  • El Conseyu de Gobiernu aprobó’l decretu que va dexar reforzar la coordinación ente l’Alministración autonómica y los conceyos nesta materia
  • Esti instrumentu nuevu va ameyorar la cooperación económica, técnica y alministrativa pa desenvolver actividaes, crear servicios normalizadores nuevos y impulsar cursos formativos

El Conseyu de Gobiernu dio lluz verde al decretu que crea y regula la Rede de Normalización Llingüística, un instrumentu que va dexar reforciar la coordinación ente l’alministración rexonal y los conceyos pa promover l’usu institucional y públicu del asturianu y l’eonaviegu. La Rede defínese como un órganu colexáu, d’adhesión voluntaria, de participación institucional y d’impulsu, creáu pa coordinar proyectos, actividaes y actuaciones de los distintos servicios y empobináu a dinamizar l’usu de les llingües propies.

La Rede ta llamada a desempeñar un papel fundamental na regulación territorial de la política llingüística, na creación de servicios normalizadores nuevos, nel caltenimientu de los que yá tán funcionando y na coordinación y desenvolvimientu de l’actividá de toos ellos. L’aprobación del decretu da carta de naturaleza a un instrumentu que yá funcionaba de manera non reglamentada como plataforma collaborativa de trabayu ente’l personal técnico de los distintos servicios. Cuasi la metá de los conceyos asturianos cunten nesti momentu con unidaes alministratives que s’ocupen de la normalización de les llingües y dan serviciu a más de la metá de la población del Principáu.

Dende la Conseyería de Cultura, Política Llingüística y Turismu impulsóse la regulación normativa de la Rede de Normalización Llingüística como pasu previu al establecimientu d’un futuru consorciu de política llingüística. Tamién queda prevista na redacción del decretu, de cara a un futuru, la incorporación d’aquelles entidaes privaes ensin ánimu d’arriquecimientu (cámares de comerciu, fundaciones, asociaciones empresariales, de consumidores, conseyos reguladores, etc.) que lo soliciten.

La regulación de la Rede de Normalización Llingüística representa un pasu más nel compromisu del Gobiernu d’Asturies por dinamizar l’impulsu y la recuperación del nuestru patrimoniu llingüísticu. La collaboración colos conceyos asturianos demostró que la xestión averada a la ciudadanía que desenvuelven los servicios de normalización supón una ferramienta eficaz pa llograr la promoción del usu del asturianu y l’eonaviegu.

El decretu nuevu quier dir ameyorando la dotación económica y de personal d’estos servicios na midida na que lo dexen los presupuestos, amás de realizar un esfuerciu mayor de coordinación ente ellos y el Principáu, d’estabilización y desenvolvimientu, de manera que puedan cumplir col so cometíu dinamizador de la política llingüística que se promueve.

La estructura de la Rede de Normalización Llingüística va articulase nun Conseyu de la Rede que va tener una presidencia y vicepresidencia que van ocupar, respectivamente, les persones responsables de la conseyería y de la dirección xeneral con competencies en materia de política llingüística y un númberu ilimitáu de vocalíes que van dexar cuntar con representantes de cada alministración pública o entidá que se xunte a la Rede. Nun van percibir retribución dalguna pola so participación.

El Decretu prevé tamién la creación d’una Comisión Técnica formada por personal técnico de los respectivos Servicios y de l’Alministración del Principáu; a esta comisión correspuénde-y realizar estudios, proyectos, actividaes, programes, planes y propuestes en materia de política llingüística, pudiendo formar los grupos de trabayu que considere necesarios.


Audios del director general de Política Llingüística, Antón García, sobre la Rede de Normalización Llingüística (mp3 1039 Kb - n'español)