Categories Navigation

Categories Navigation

Mediu Ambiente va iguar anguaño’l problema de depuración d’agua na aglomeración Sella-Piloña

25/04/2022
  • La fin de les obres de prollongación del colector de Bimenes, con una inversión de 2,8 millones, va facer posible correxir l’únicu incumplimientu de competencia autonómica al respective de la directiva europea de saniamientu

El vicepresidente y conseyeru d’Alministración Autonómica, Mediu Ambiente y Cambéu Climáticu, Juan Cofiño, avanzó güei que l’aglomeración Seya-Piloña, l’incumplimientu de competencia autonómica que mantién Asturies al respective de la directiva europea de saneamientu y depuración d’agua residual, va solucionase anguaño cola fin de les obres de prollongación del colector de Bimenes hasta la conexón col colector interceptor d’El Ríu Piloña, en Nava.
 
L’actuación, que tien un costu de 2,8 millones, alcuéntrase na fase final y va solucionar los problemes que xeneren l’incumplimientu. D’esta manera, Asturies va tar nuna disposición meyor pa cumplir la directiva europea, tanto nos sistemes de responsabilidá rexonal como estatal, según destacó Cofiño nuna comparecencia énte la Comisión d’Alministración Autonómica, Mediu Ambiente y Cambéu Climáticu de la Xunta Xeneral.
 
Amás, el conseyeru espresó la intención de siguir trabayando nel  tratamientu d’agua residual. Nesti sentíu, refirióse al Plan Director de Saniamientu y Depuración del Principáu, que va aprobase d’equí a poco y que, ente otros aspectos, busca completar la depuración de toles aglomeraciones urbanes, inclusive les de menos de 2.000 habitantes equivalentes, y una parte grande de les agrupaciones rurales, formaes por una o delles poblaciones, que seyan susceptibles de soluciones de depuración colectives.
 
Embalse de Tañes
 
Otra manera, el vicepresidente destacó’l compromisu del Gobiernu d’Asturies y de les demás alministraciones pa caltener la calidá del agua del embalse de Tañes y facer posible’l desenvolvimientu económicu de los conceyos de Casu y Sobrescobiu. Amás, sorrayó que, dende l’aprobación nel 2020 del Instrumentu de Xestión Integráu (IXI) de los espacios protexíos de dambos conceyos, l’Executivu asturianu “foi dando pasos p’acomodar y compatibilizar tolos usos”, al empar que recordó que l’IXI establez dellos topes empobinaos a caltener la calidá del agua, como’l referíu a la necesidá de que les embarcaciones que naveguen nel embalse seyan cautives, requisitu al que nun presentaron alegaciones nenguna alministración nin entidá.
 
“A partir d’equí, siguióse una tramitación necesariamente complexa, polos valores relevantes del espaciu y los sos usos, y porque intervienen munchos actores, como Conceyos, dellos departamentos del Principáu, la Confederación Hidrográfica del Cantábricu, Cadasa, y EDP, ente otros”, agregó’l conseyeru.
 
Amás, remarcó que Cadasa, “ufiertó la máxima collaboración y atendió tolos requerimientos en tiempu y forma, reuniéndose cola Federación de Piragüismu, colos Conceyos, cola Confederación y colos demás departamentos del Executivu autonómicu, siempre que-y lo solicitaron”.
 
“Ye obvio que, siendo sensibles a l’aspiración llexítima qu’existe de sacar partíu a los recursos naturales del territoriu, Cadasa tea obligada a velar pola mengua del riesgu pa la garantía de serviciu del sistema públicu d’abastecimientu”, recalcó Cofiño. Nesti sentíu, punxo como exemplu l’impactu que tendría nel sistema la posibilidá d’introducción d’especies como’l moxón cebra, que pue llegar a afectar a los procesos de la potabilizadora de Rusecu, a los más de 13 quilómetros de túneles y a otros tantos de conducciones ensin desdoblar, que nun tienen alternativa en casu de que se rexistrare dalguna incidencia pola so afección.