Categories Navigation

Categories Navigation

Les estaciones d’esquí asturianes zarren una temporada récord, con más de 150.000 usuarios y 1,9 millones recaudaos por venta de forfaits

25/04/2022
  • La meteoroloxía favorable dexó abrir les instalaciones 133 díes, ún de los periodos más llargos de los últimos años
  • Cuasi 5.000 escolares de 113 centros educativos participaron na Selmana Blanca de Payares y Fontes d’Iviernu

Les dos estaciones d’esquí asturianes, dependientes de la Conseyería de Cultura, Política Llingüístca y Turismu, punxeron el ramu a una temporada histórica, con 150.184 usuarios en global y una recaudación total por venta de forfaits de 1.922.944 euros. Estes cifres reflexen l’actividá intensa que rexistraron Fontes d’Iviernu y Valgrande-Payares ente’l 2 d’avientu del 2021 y el 17 d’abril pasáu.
 
La meteoroloxía favorable, que fixo posible mantener abiertes les instalaciones nún de los periodos más llargos de los postreros años, contribuyó de manera determinante a los bonos resultaos. De los 143 díes que duró la temporada, Fontes d’Iviernu tuvo abierta 133 xornaes y Valgrande-Payares, 125.
 
El balance final revela que 81.067 usuarios pasaron per Fontes d’Iviernu nel so 15.u aniversariu, una cifra que supón un récord históricu pa la instalación. Pela so parte, Valgrande-Payares atraxo a 69.117 esquiadores.  
 
En total, ente dambes estaciones emitieron 2.547 abonos conxuntos pa la temporada, de los que 681 vendiéronse por prepagu y 1.866 por venta normal. La compra de forfaits supunxo 1.200.392 euros en Fontes d’Iviernu, máximu históricu de la estación, y 722.552 en Valgrande-Payares.
 
La Selmana Blanca llevó a les dos estaciones a 4.864 escolinos de 113 centros educativos de toa Asturies. Payares recibió a 2.256 neños y neñes de 53 escueles, que tuvieron una media de 3,31 díes. Per Fontes d’Iviernu pasaron 2.608 alumnos de 60 escueles a lo llargo d’una media de 2,76 xornaes. Aparte de la so actividá ordinaria, dambos equipamientos acoyeron nestos cuatro meses y medio una ventena d’eventos y competiciones oficiales nes sos instalaciones.


​​​​​​​ Audios de la directora general de Deporte, Beatriz Álvarez Mesa (mp3 975 Kb)