Categories Navigation

Categories Navigation

Un estudiu d’Educación señala la importancia del cuidáu socioemocional del alumnáu depués de la esperiencia de la pandemia

25/04/2022

de izquierda a derecha, el coordinador de Evaluación y Calidad, Rubén Fernández; la consejera de Educación, Lydia Espina, y el técnico del Servicio de Evaluación, Ricardo Fernández​​​​​​​

  • L’informe Volvemos a clas analiza les vivencies de profesoráu y estudiantes cuando’l confinamientu
  • ​​​​​​​La crisis sanitaria xeneró una situación nueva nos procesos d’enseñanza y deprendimientu
  • Cuasi tolos encuestaos quier más les clases presenciales  

La importancia del cuidáu socioemocional del alumnáu nel sistema educativu, la preferencia xeneralizada ente docentes y estudiantes poles clases presenciales o la relevancia de la implicación de les families na enseñanza son dalgunes de les conclusiones del estudiu Volvemos a clas, presentáu güei pola Conseyería d’Educación.

Esti análisis ellaboróse a partir d’una encuesta qu’afonda na esperiencia del profesoráu y del alumnáu na suspensión de l’actividá llectiva presencial nos últimos meses del cursu 2019-2020 pola mor de la crisis sanitaria de la covid y la vuelta posterior a la enseñanza presencial na seronda del 2020.

“Llegó’l momentu de llevantar la mirada y facer un análisis fondu del impactu que la crisis sanitaria tuvo sobre’l nuestru sistema educativu, acullá de los resultaos académicos, el volume d’aprobaos o la tasa de repetición”, esplicó la conseyera Lydia Espina. Tamién destacó la importancia de reforciar el cuidáu integral del alumnáu: “Ye probable qu’un estudiante que sabe rellacionase ente iguales, que trabaya nun bon clima y llogra un desenvolvimientu emocional equilibráu algame resultaos meyores”.

Volvemos a clas, realizáu cola collaboración de la Fundación Santa María, divídese en dos informes, L’impactu del confinamientu nel profesoráu y Sentimientos del alumnáu mentes y depués del confinamientu, que se publiquen coincidiendo col segundu añu de les feches nes que se suspendió la presencialidá nes aules.

Pa la so ellaboración, cuntóse cola participación voluntaria de 613 docentes y 5.257 estudiantes, que respondieron a les encuestes de manera confidencial y anónima. El trabayu de campu fíxose n’ochobre del 2020 en 32 centros educativos.

Dambos informes analicen les respuestes daes a cuestiones propuestes tocante a cinco aspectos: les condiciones sociales personales, la situación socioemocional cuando’l confinamientu, la valoración del deprendimientu nesos momentos, la situación socioemocional al volver a los centros y l’actitú del deprendimientu na vuelta a les aules.

Del análisis xeneral y la comparanza exhaustiva de les respuestes ente alumnáu y profesoráu, llégase a cuatro conclusiones principales:

  • La familia y el profesoráu foron los factores fundamentales de protección pa un númberu importante d’estudiantes.
  • El profesoráu sintióse mui apoyáu polos equipos directivos.
  • La mayoría del alumnáu y cuasi tol profesoráu quieren más la enseñanza presencial.
  • L’andanciu y el confinamientu xeneraron una situación nueva nos procesos d’enseñanza y deprendimientu.

 

L’alumnáu

L’informe qu’analiza les percepciones y emociones de los estudiantes desvela que, mentes foi’l confinamientu, dispunxeron de condiciones afayadices pal estudiu (espaciu, recursos informáticos, conexón a internet, etcétera). La estimación del tiempu dedicáu al estudiu ta ente les 2 hores diaries en Primaria y les 3 en Bachilleratu. Les actividaes de deprendimientu en contestos desfavorecíos foron más complicaes, al disponer de menos recursos informáticos, lo que supunxo una menor dedicación de tiempu al estudiu.

Al respective de la situación socioemocional cuando’l confinamientu, l’informe reflexa que la mayoría recibió un apoyu satisfactoriu y axustáu a la edá. En xeneral, la familia y el profesoráu foron les principales referencies positives.

Les dificultaes d’adaptación manifestaes nel confinamientu, sobre manera de los adolescentes, indiquen la importancia d’incorporar el cuidáu del bienestar socioemocional ente los oxetivos principales de los centros educativos.

En cuantes a la valoración del procesu d’enseñanza-deprendimientu nel confinamientu, paez tar asociada a la edá. Asina, mentes los estudiantes de Primaria muestren actitúes más positives en tolos aspectos, los d’enseñances postobligatories tienen más reparos, sobre manera nel casu de Formación Profesional (FP).

La mayor parte señala que se sintió bien al volver a les aules, anque les sensaciones dependen tamién de la edá y son más positives nes etapes obligatories, sobre manera en Primaria. Col comienzu de les clases presenciales, los estudiantes mostráronse motivaos pa deprender, enfotaos en superar les dificultaes cola ayuda del profesoráu y seguros d’aprobar el cursu nuevu.

Les opiniones manifestaes polos estudiantes apunten a dos retos principales pa los centros: ampliar l’atención y el tiempu de deprendimientu del alumnáu d’entornos desfavorecíos y incorporar el desenvolvimientu emocional ente los oxetivos educativos prioritarios.

 

El profesoráu

En cuantes al profesoráu, l’informe revela que’l confinamientu supunxo pa los profesionales una tensión emocional bien grande, al tener que s’afacer al modelu d’enseñanza a distancia ensin preparación previa y encarase con un cambéu radical de la forma d’enseñar.

Amás, l’estudiu concluye que cuasi la totalidá quier más el modelu d’enseñanza presencial. Tres del confinamientu, los docentes volvieron a les aules motivaos pa enseñar al alumnáu a pesar de les dificultaes y les esmoliciones pola posibilidá de contaxos nos centros.

L’informe destaca l’esfuerciu escomanáu que fixeron pa enseñar de la meyor manera posible nel confinamientu. Tamién señala que los docentes sintiéronse mui apoyaos polos compañeros y polos equipos directivos, tanto cuando’l confinamientu como na vuelta a les aules.

L’estudiu recueye tamién los aspectos nos que’l profesoráu va poner más atención depués d’esta esperiencia: la potenciación del usu de les tecnoloxíes nueves y el cuidáu del bienestar emocional del alumnáu. Tamién van centrase n’animar a los estudiantes a deprender, esforciase y ser responsables.