​​​​​​​

• El 69,4% d'estos domicilios percibe la prestación na comunidá, frente al 33,5% de promediu nacional
• L'informe Foessa destaca la evolución de la inclusión nel Principáu

Asturies cuenta con ún de los niveles de cobertura más elevaos del país na prestación de rentes mínimes. Tal que señala l'informe de la Fundación Foessa, el salariu social básicu llega n'Asturies al 69,4% de los llares en situación de probeza severa, frente al 33,5% de media nacional.

La conseyera de Derechos Sociales y Bienestar, Melania Álvarez, recibió güei a los responsables del últimu informe d'esta entidá sobre esclusión y desenvolvimientu social nel Principáu, una edición qu'analiza l'impactu de la covid-19 nos niveles d'esclusión ya integración social.

L'informe apunta que n'Asturies, al contrario de lo qu'asocede nel restu del país, ameyora la inclusión social y amenórguense les situaciones d'esclusión. Asina, la encuesta reflexa que nel Principáu les situaciones d'integración ente 2018 y 2020 crecieron trés décimes, al pasar del 81,6% al 84,1%, ente que les d'esclusión baxaron del 18,4% al 15,9%.

Otramiente, el documentu constata una medra de los casos d'esclusión severa. P'atayalo, la Conseyería de Derechos Sociales y Bienestar punxo en marcha'l proyectu Xeitu, que cunta con una dotación de 1,5 millones de la Unión Europea. Trátase d'una de les nueve iniciatives que reciben financiamientu del fondu Fondu Européu pal Empléu y l'Innovación Social (Easi) na so última convocatoria. El so oxetivu ye averar a les persones en situaciones d'esclusión severa al mercáu llaboral, ufiertándo-yos sofitu en diverses materies. El programa va incorporar a usuarios que, por distintes razones, nun apuerten a les prestaciones y servicios del sistema de protección y a aquellos con rentes mínimes de llarga duración.