El Gobiernu d’Asturies promociona los productos pesqueros y de l’acuicultura na feria internacional Seafood de Barcelona
- El Principáu participa nesta cita, qu’empieza güei, con un estand xunto a seis empreses especializaes
- Esti eventu agroalimentariu, ún de los más importantes a nivel mundial, axunta 2.000 espositores de más de 150 países
El Gobiernu d’Asturies promociona los productos pesqueros y de l’acuicultura na Feria Internacional de Productos del Mar Seafood Expo Global, en Barcelona. El Principáu dispón d’un estand de 100 metros cuadraos onde seis empreses de la comunidá van mostrar les sos ellaboraciones y va espardese la marca Alimentos del Paraísu.
El director xeneral de Pesca Marítima, Francisco González, visitó güei l’espositor asturianu nesti eventu, ún de los más importantes del sector pesqueru a nivel mundial. González señaló qu’estes acciones de promoción allíniense coles exes recoyíes na estratexa rexonal nueva del sector pesqueru hasta’l 2030, en concreto, coles midíes empobinaes al desenvolvimientu d’una cadena comercial segura, moderna, trazable y dinámica, dende’l marineru hasta’l consumidor.
Tamién destacó qu’anguaño destínense 2,7 millones a garantizar el desenvolvimientu socioeconómicu del sector, amás d’a la comercialización y tresformación de los productos pesqueros y a l’acuicultura. De la cantidá total, más de 215.000 euros van dedicase a la promoción de productos de la pesca y a l’asistencia a feries, como la barcelonesa, que s’inaugura güei, o la de Conxemar, en Vigo.
Seafood, onde participen 2.000 espositores de más de 150 países, va allargase hasta’l xueves. Les empreses y asociaciones profesionales que comparten espaciu como co-espositores nel estand, xunto al Gobiernu d’Asturies, son estes:
- Vivapesca Import-Export. Especializada na conxelación de pescáu peláxico procedente del norte d’España pa la so esportación. Trátase del mayor esportador asturianu de productos pesqueros fuera de la Unión Europea.
- Cetárea Tazones. Desenvuelve como actividá principal la importación de mariscu vivo. Nes instalaciones dispón de viveros industriales y una fábrica de tresformación de mariscu especializada en productos gourmet que comercializa cola marca Delibrab.
- Asturpesca. Dedicada a la manipulación, tresformación y venta de pescáu y mariscu fresco, ellaborao y conxelao, amás de lo filetiao.
- Fresgea. Céntrase na ellaboración y distribución de pescáu y derivaos y dispón de delegaciones en seis comunidaes, incluyida Asturies.
- Congelados Basilio. Empresa con más de cien años d’esperiencia nel sector del pescáu fresco y/o procesao, con sede en Llugones.
- Sellavarim. Empresa de tresformación allugada n’Avilés y especializada en semiconserves de pescáu, ellaboraos y trucha asalmonao certificao baxo la marca Alimentos del Paraísu.
