• El presidente del Principáu, Adrián Barbón, visitó güei l’equipamientu nuevu, nel que la Conseyería de Derechos Sociales y Bienestar invirtió más de 7,3 millones
• ​​​​​​​​​​​​​​La instalación dispón de 120 places, que se van ocupar progresivamente, y va llegar a los 53 emplegaos cuando funcione a rindimientu plenu​​​​​​​

La residencia nueva de mayores de Llugones, dependiente del organismu autónomu Establecimientos Residenciales p’Ancianos d'Asturies (ERA), acueye yá a una decena d'usuarios y cunta con una plantiya de 30 trabayadores nestos momentos. El presidente del Principáu, Adrián Barbón, visitó güei les instalaciones, nes que la Conseyería de Derechos Sociales y Bienestar invirtió más de 7,3 millones.

L'equipamientu allúgase nuna parcela de 5.800 metros cuadraos cedida pol Conceyu de Siero y suma 7.000 metros cuadraos de superficie útil, distribuyíos nuna planta semisótanu y trés edificaciones rectangulares, caúna de trés pisos, qu'en xunto asemeyen un trébole de trés fueyes. La residencia dispón de 120 places, que se van dir ocupando progresivamente, y va llegar a los 53 puestos de trabayu cuando empreste serviciu a rindimientu plenu, previsiblemente depués del branu.
 
El centru dispón d'una zona amplia d'aparcamientu nel semisótanu, onde tamién s'alluguen l'almacén y los vestuarios. Na planta baxa asítiense la recepción, el comedor, la cafetería y delles sales d'usos múltiples onde se van ufiertar servicios d'enfermería, peluquería, podoloxía, fisioterapia y ximnasia. Nos dos pisos superiores distribúyense les 86 habitaciones, de les cuales el 60 % son individuales y el 40 % dobles. Amás, na entrada del edificiu habilitóse un área, diseñada en forma de plaza, pa que les persones mayores puedan pasiar a diariu.
 
La residencia va implantar un modelu nuevu d'atención centráu na persona, que va fomentar la integración de la comunidá cola participación de les persones residentes y de les sos families.
 
La Confederación Asturiana de la Construcción (CAC-Asprocon) reconoció col Premiu Plomada de Plata la obra d'esti edificiu, na categoría de meyor fachada rehabilitada o de nueva construcción destinada a otros usos distintos a la vivienda. El xuráu valoró la combinación de zones acristalaes protexíes de la radiación solar que, de la mesma, funcionen como espaciu de relación de les persones usuaries.
 
Anguaño, l’ERA tien 27 centros y alministra directamente 3.212 places, a les que se sumen otres 328 de xestión indirecta, 2.110 concertaes y 225 apartamentos. Nel área IV de Servicios Sociales, con cabecera n'Uviéu y a la que pertenez el conceyu de Siero, l’ERA xestiona directamente 1.247 places xeriátriques, ente residenciales y centros de díes.