• Trátase del tercer hospital públicu asturianu acreitáu col sellu GETECCU
• La consulta monográfica de la Enfermedá de Crohn y Colitis Ulcerosa atiende a más de 700 pacientes del área d’Avilés

 
El Serviciu de Dixestivu del Hospital Universitariu San Agustín d’Avilés (HUSA), cabecera del área sanitaria III, algamó la certificación de calidá de l’asistencia sanitaria a pacientes con enfermedá inflamatoria intestinal que concede’l Grupu Español d’Enfermedá de Crohn y Colitis Ulcerosa (GETECCU).
 
El director xeneral de Política y Planificación Sanitaries, Sergio Valles, va asistir mañana, a les 14:00 hores, nel salón d’actos del HUSA, a la entrega d’esti sellu de calidá.
 
La consulta monográfica de la Enfermedá de Crohn y Colitis Ulcerosa del centru sanitariu algamó esti certificáu desque superó a primeros d’añu una auditoría esterna fecha pol organismu Bureau Veritas, que testó 53 indicadores de calidá. Esta evaluación destacó’l siguimientu exhaustivu de los pacientes y la resolución tan alta de los casos, al programar al empar esploraciones y pruebes. Tamién reconoció que la dedicación esclusiva d’una enfermera ameyora la calidá de vida d’estes persones.
 
Más de mediu centenar d’hospitales d’España disponen del certificáu GETECCU. L’HUSA ye’l terceru que recibe esti sellu n’Asturies, depués del Hospital Universitariu Central (HUCA) y l’Hospital Universitariu de Cabueñes (HUCab).
 
La consulta monográfica implantóse nel 2008 y atiende a más de 700 pacientes d’Avilés y de la contorna. La prevalencia de la enfermedá de Crohn y de la colitis ulcerosa asítiase nel área sanitaria en 6 casos por 10.000 habitantes, dalgo superior a la media nacional. Cada añu manifiesten estes enfermedaes ente 30 y 40 pacientes nuevos.
 
Trátase de dos patoloxíes dixestives autoinmunes que riquen tratamientos inmunosupresores y onde los síntomes estradixestivos apaecen n’articulaciones, piel y güeyos, polo que la consulta monográfica trabaya coordinadamente colos Servicios de Ciruxía Xeneral y Reumatoloxía.
 
La enfermedá de Crohn afecta al tubu dixestivu, dende la boca hasta l’anu, mentes que la colitis ulcerosa daña l’intestín gruesu. Xeneralmente, manifiéstense ente los 20 y los 40 años, pero puen detectase a cualquier edá. Dambes tienen una incidencia asemeyada ente la población de dambos sexos.
 
Estes patoloxíes cróniques trátense con fármacos inmunomoduladores y biolóxicos y hasta un 70 % de los pacientes riquen intervención quirúrxica.​