​​​​​​​

• ​​​​​​​La feria madrilana val de marcu a la Conseyería de Mediu Rural pa promocionar los productos amparaos por esta marca de calidá

Los productos amparaos pola marca de calidá Alimentos del Paraísu van ser mañana los protagonistes de la xornada nel 35.u Salón Gourmets, que se celebra hasta’l xueves en Madrid, con dellos eventos culinarios y de preba pa promocionar esti sellu na feria agroalimentaria.

La directora xeneral de Desenvolvimientu Rural y Agroalimentación, Begoña López, que tuvo güei un alcuentru con empresarios asturianos del sector nesti eventu, destacó la calidá del so trabayu, rellacionáu con un modelu de producción singular y con un entornu rural asociáu a los valores de sostenibilidá. “Alimentos del Paraísu ye l’exemplu d’un apueste, tanto poles persones que viven nel mediu rural, produciendo alimentos escelentes, como pola industria agroalimentaria, cada vez con más puxu nos mercaos”, aseguró.

López esplicó que’l Gobiernu d’Asturies diseñó una programación ambiciosa nesti foru con Alimentos del Paraísu como referente de la calidá gourmet. Tamién destacó que les ellaboraciones lligaes a esta marca “axunten tradición con innovación, sostenibilidá económica, medioambiental y social”, al empar que se presenten productos nuevos, como la primer lleche ecolóxico asturiano, “cada vez con más demanda polos consumidores”, añadió.

Alimentos del Paraísu consolidóse a lo llargo de los años con incorporaciones nueves y actualmente tien 363 productores autorizaos. López sorrayó la importancia de la promoción n’eventos de sonadía internacional, como’l Salón Gourmets, p’ameyorar la comercialización y ganar cuotes de mercáu.
 
El programa de mañana incluye estos actos:

• IXP Faba Asturiana-Compangu y un showcooking a cargu del cocineru Antonio Cosmen, premiu a la Meyor Fabada de Madrid.
• DOP Sidra d’Asturies: Cómo escanciar un culete perfecto, a cargu d’Abraham Castellanos.
• DOP Vinu de Cangas con pescáu de la Rula d’Avilés, con un showcooking dirixíu por Charo Vals, defensora de la cocina sostenible.
• IXP Xata d’Asturies con DOP Vinu de Cangas y showcooking de Covadoga Pérez Silva (Sidrería El Llagar) y Ramón Martínez López (Máster Chef de los locales Canalla).
• Quesos DOP y IXP d’Asturies con IXP Miel d’Asturies, a cargu del maestru queseru Manuel Rodríguez.
• Postres ecolóxicos con productos Copae y showcooking a cargu d’Anita Bee y Carlos Alvear.​​​​​​​