​​​​​​​

• La Conseyería de Presidencia habilitó’l corréu electrónicu  asturiasconucrania@asturias.org p’atender les consultes rellacionaes con esta crisis humanitaria​​​​​​​
• 760 persones diéronse d’alta pa l’asistencia sanitaria de baldre nuna ventena de conceyos, el 68 % n’Uviéu y Xixón
• La rede educativa del Principáu escolarizó 219 alumnos en 186 unidaes de 96 centros educativos

Un total de 1.006 persones pidieron protección temporal n’Asturies dende’l 8 de marzu pasáu, fecha na que’l Conseyu de Ministros activó esti mecanismu pa persones afectaes pola invasión rusa d’Ucraína. El Gobiernu d’Asturies habilitó la dirección de corréu electrónicu asturiasconucrania@asturias.org pa quien precise solicitar información rellacionada con esta crisis humanitaria.
 
Esti serviciu ye una manera más rápida y personalizada d’atender los cientos de consultes de particulares que recibe l’Axencia Asturiana de Cooperación al Desenvolvimientu pa la puesta a disposición de viviendes. Al empar, la Conseyería de Presidencia editó un documentu de preguntes frecuentes, con orientaciones pa la población refuxao, que va dir actualizando periódicamente. El testu incluye cuestiones d’interés sobre l’accesu a la protección temporal, la escolarización de la infancia y l’adolescencia, l’atención sanitaria y les cartíes de vacunación, los recursos específicos pa casos de violencia contra les muyeres y les neñes, les oficines del Serviciu Públicu d’Empléu (Sepepa) y recomendaciones p’algamar una cooperación humanitaria eficaz.
 
Hasta agora, 760 persones de nacionalidá ucraína —492 muyeres (64,7 %) y 268 homes (35,2 %)— diéronse d’alta na tarxeta sanitaria en más d’una ventena de conceyos, anque’l 68 % concéntrase n’Uviéu y Xixón. Al respective de la edá, 511 son adultos (67,2 %) y 249 menores de 14 años (32,8 %).
Otra manera, xestionáronse 219 escolarizaciones d’alumnáu en 186 unidaes de 96 centros educativos.

Integración del alumnáu

Pa favorecer la integración, la Conseyería d’Educación punxo en marcha un aula nueva d’inmersión llingüística adscrita al Institutu d’Educación Secundaria (IES) Jovellanos de Xixón, que va tener calter itinerante y va responder a les necesidaes del alumnáu d’incorporación tardía al sistema educativu, tanto del propiu centru como d’otros de la mesma zona. Esta decisión reflexa’l determín del Gobiernu d’Asturies de reforciar el sistema d’enseñanza pa responder con garantíes plenes a la llegada del alumnáu ucraíno que se vio obligao a dexar el so país por mor de la invasión rusa, anque l’aula va dar respuesta tamién a estudiantes d’otres nacionalidaes.
Al mesmu tiempu, creóse un espaciu online específicu, qu’ufierta a los centros recomendaciones y recursos pa facilitar l’acoyida y l’atención educativa más inmediata al alumnáu y que se pue consultar nel enllaz: https://alojaweb.educastur.es/web/acogida/ucrania. Tamién se ta entamando formación específica pal profesoráu al traviés del CPR d’Avilés.

Acción humanitaria

Dende la perspectiva de l’acción humanitaria, activóse un fondu de continxencia, pola cantidá de 400.000 euros, al traviés del conveniu que tien l’Axencia Española de Cooperación Internacional con Asturies y otres 10 comunidaes, p’ameyorar la situación de les persones afectaes pol conflictu n’Ucraína.
 
Pela so parte, el Principáu, en collaboración cola Federación Asturiana de Conceyos y otres organizaciones, identificó 731 places d’acoyida, 706 d’elles al traviés de los conceyos. Cruz Bermeya Asturies y l’Axencia Asturiana de Cooperación empezaron yá les visites a dalgunos d’estos recursos pa evaluar si son afayadizos y comunicalo al Ministeriu d’Inclusión, Seguridá Social y Migraciones.
L’Executivu autonómicu dispón d’un centenar de places que tán permanentemente a disposición del Sistema de Protección Internacional, a les que’l 15 de marzu pasáu s’añadieron otres 110, de resultes de la cooperación directa ente’l Gobiernu d’España y el Principáu pa l’acoyida de 84 persones con discapacidá, 25 d’elles menores, y les demás acompañantes y personal del centru onde vivíen na rexón ucraína de Donetsk.

Audio de la Directora de la Agencia Asturiana de Cooperación, Beatriz Coto. (mp3 362 Kb)
Audio con declaraciones de la consejera de Presidencia, Rita Camblor (mp3 1460 Kb)