​​​​​​​

• La iniciativa surde del primer foru internacional sobre esti segmentu turísticu, entamáu pol Principáu en Cangues d’Onís
• Les dos xornaes de debate completáronse con dellos alcuentros comerciales onde participaron 70 empreses

El Gobiernu d’Asturies va poner en marcha una mesa profesional del ecoturismu pa impulsar esti sector. La iniciativa ye una de les conclusiones del I Foru Internacional d’Ecoturismu, qu’esta tarde clausuró la viceconseyera de Turismu, Graciela Blanco, en Cangues d’Onís. “Trátase d’una estructura de reflexón, pero, sobre manera, d’acción pal diseñu y construcción del futuru del sector”, aseguró.

Blanco, que presentó la midida xunto a los promotores, celebró l’apoyu tan ampliu que recibió. La mesa futura tien como miembros fundadores a les organizaciones principales del sector: Asociación Fontes del Narcea, Redes Natural, Asociación d’Ecoturismu d’Asturies, Asociación d’Hostelería de Somiedu y Ecopicos. Pol Principáu, van tar representaes las viceconseyeríes de Turismu y de Mediu Ambiente y Cambéu Climáticu, la Dirección Xeneral del Mediu Natural y Planificación Rural y les direcciones de los espacios protexíos.

La viceconseyera, qu’incluyó la creación d’esta mesa sectorial ente les midíes desenvueltes a partir de la Estratexa de Turismu 2020-2030, destacó que la so puesta en marcha va facilitar “una aplicación más afinada de les polítiques, estratexes y proyectos pal ecoturismu n’Asturies”.

Tamién se refirió a dos acciones yá en marcha: la primera, l’acuerdu de collaboración cola Asociación d’Ecoturismu d’España pa promover la certificación de tolos espacios protexíos d’Asturies, amás de les empreses turístiques que desenvuelven la so actividá nesi ámbitu. La segunda, la presentación del proyectu de corredor d’ecoturismu de la España Verde a la convocatoria d’ayudes Next Generation xunto a Galicia, Euskadi y Cantabria. Esta iniciativa, qu’algama los 800.000 euros d’inversión, va facer que la marca turística disponga del mayor corredor d’esta clas d’Europa.

Alcuentru comercial

El I Foru Internacional d’Ecoturismu foi un espaciu pal contactu comercial ente profesionales. Un total de 70 empreses rellacionaes con esti sector tomaron parte nel taller de trabayu entamáu al empar que l’alcuentru pa desenvolver productos lligaos a esta tendencia turística n’Asturies. Les dos xornaes de debate peslláronse con delles conclusiones, ente les que destaca la contribución del turismu sostenible al caltenimientu de delles especies d’animales y de comunidaes locales pequeñes. Los espertos tamién destacaron la importancia del trabayu en comuña ente los xestores d’espacios protexíos, les empreses, les alministraciones públiques y los ecoturistes mesmos.

El papel fundamental del guía local especializáu, non solo pa interpretar los recursos, sinón tamién pa facer pedagoxía y ética del contactu ente’l visitante y la fauna montés, foi otru de los aspectos analizaos.

Profesionales y espertos coincidieron en sorrayar el llabor de les asociaciones p’ayudar a superar localismos y la competencia ente empreses, amás de cooperar en redes nacionales y internacionales. Tamién se valoraron los clubes d’ecoturismu como ferramienta pa establecer el marcu y los requisitos necesarios pa xenerar esperiencies auténtiques y respetuoses col entornu natural, social y cultural. La dimensión más técnica del foru centróse nel estáu del sector y les sos espectatives.

Ente los espertos que participaron nesti alcuentru destaquen Tim Appleton, vicepresidente de la Unión Británica d’Ornitólogos, qu’encabezó un panel con representantes d’axencies internacionales, como Birdquest (Reinu Uníu), Yuhina (Francia) o Perlenfaenger (Alemaña); y directores de dellos espacios naturales, como Verónique Hidalgo (Parque Natural de Les Landes, Francia), hasta sumar 22 ponentes.