• El Principáu confía en que la llimitación del preciu del gas tamién contribuya a contener la inflación
• La incorporación de la comunidá a el corredores d'hidróxenu de la UE facilita'l desenvolvimientu de los proyectos que pretenden asitiase na rexón

El Gobiernu d'Asturies valora positivamente l'alcuerdu alcanzáu por España y Portugal cola Comisión Europea pa lliimitar l'impactu del preciu del gas nel recibu eléctricu, una midida que va suponer un aliviu pa la industria rexonal y les families.

El mecanismu alcordáu va amenorgar los precios de referencia del gas nos próximos doce meses, lo que va facilitar una importante rebaxa de les factures de los consumidores, especialmente les relatives a los industriales, nes que'l pesu del costu de la eletricidá ye enforma mayor.

Esti amenorgamientu nun va beneficiar solo a les families y pymes, sinón tamién, y especialmente, a la industria rexonal; sobremanera a les empreses altamente consumidores d'enerxía, les más espuestes a los aumentos de los precios del gas y de la eletricidá y a la volatilidá de los mesmos.

L'Executivu del Principáu confía tamién en qu'esti alcuerdu cola Comisión Europea contribuya contener la inflación.

El Gobiernu d'Asturies repite, sicasí, que les industries altamente consumidores d'enerxía han de tener un tratamientu específicu y singular qu'embriva l'impactu que tán sufriendo de resultes de los aumentos escepcionalmente importantes de los costos enerxéticos.

Coles mesmes, l'Executivu aportuna na necesidá de garantizar la máxima compensación por costos d'emisiones indirectes de CO2, col usu del 25% de los ingresos por puya de derechos d'emisión de gases d'efectu invernaderu, el porcentaxe máximu dexáu pola Comisión Europea.

Corredor européu del hidróxenu

En cuanto al plan REPowerEU, llanzáu pola Comisión Europea p’ aumentar la resiliencia del sistema enerxéticu na UE, el Gobiernu d'Asturies destaca que s'incluyera ente les midíes contemplaes al potenciar el volume de producción ya importación de biometanu ya hidróxenu anovable.

P'aumentar el suministru de gases anovables, promuévense tamién les redes transeuropees, polo que los operadores a nivel européu definieron los corredores necesarios. Amás va ser posible asegurar el suministru d'hidróxenu y facilitar el desenvolvimientu de los proyectos de producción d'hidróxenu anovable.

El Gobiernu d'Asturies ve coherente'l corredor suroeste plantegáu, qu'inclúi al Principáu, ta alliniáu coles necesidaes previstes de suministru d'hidróxenu anovable rexonal y va facilitar el desenvolvimientu de proyectos como'l HyDeal o'l H2 ReCoDe, que se tán promoviendo n'Asturies.