​​​​​​​

• Más d’una ventena d’empreses constituyen una asociación pa impulsar proyectos competitivos nesti campu
• El conseyeru de Ciencia, Borja Sánchez, destaca esta iniciativa, onde tamién collabora la Universidá d’Uviéu, como un elementu tractor de la I+D+i rexonal

Asturies aspira a convertise nun polu de referencia nacional pa la investigación y el desenvolvimientu tecnolóxicu nel sector industrial de la defensa. Más d’una ventena d’empreses y el centru tecnolóxicu Idonial constituyeron una asociación pa impulsar la I+D+i nesti ámbitu, al traviés del desenvolvimientu de plataformes, prototipos, demostradores o materiales nuevos.

La Conseyería de Ciencia impulsó la creación d’esta agrupación, que va tener tamién la collaboración de la Universidá d’Uviéu, como vía p’aprovechar el potencial de les empreses asturianes lligaes al sector de defensa y altamente innovadores.

L’Asociación Empresarial de Tecnoloxía d’Asturies pal Desenvolvimientu de la Industria de la Defensa Ingeniero González-Hontoria, que se presentó güei, surde depués de dellos meses de preparativos cola mira de sumar fuercies y ufiertar soluciones tecnolóxiques avanzaes. Dalgunes de les llinies de trabayu onde se puen desenvolver proyectos competitivos asítiense n’ámbitos como la fabricación avanzada, materiales nuevos, testil intelixente, ximielgos dixitales, sensores y sistemes electrónicos, vehículos non tripulaos, protección personal, intelixencia artificial, plataformes de robótica, nutrición personalizada y simulación.

L’asociación ta presidida por Santa Bárbara Sistemas SAU y ocupa la secretaría la Fundación Centro Tecnológico Idonial. Amás, son empreses constituyentes Danima Ingeniería Ambiental, Expal Systems, Nanoker Research, Ingeniacity, Svmac Ingeniería Sistemas y Vehículos, Triditive, Adaro Tecnología, Estampaciones y Decoletajes Rodisa, Pixelshub, SR7, Alisys Digital, Integral Thermal Shield, Verot, Itemat Mecanización, Militex, Industrial Olmar, ArcelorMittal Investigación e Inversión, Oxiplant, y Microviable Therapeutics.

El conseyeru de Ciencia, Innovación y Universidá, Borja Sánchez, destacó’l papel que pue tener esta asociación d’empreses nel impulsu a la I+D+i rexonal como elementu tractor n’árees rellacionaes cola Estratexa d’Especialización Intelixente.

“La coordinación ente empreses, centros tecnolóxicos, Universidá y la propia Alministración va ser clave pa convertir Asturies nun polu tecnolóxicu capaz a consiguir fondos d’innovación nel ámbitu nacional y internacional y, al empar, visibilizar el potencial de les empreses asturianes como axentes tecnolóxicos nel sector de defensa”, valoró Sánchez.

Nel actu de presentación de l’asociación tamién participaron el coronel del Exércitu de Tierra Carlos Manuel Mendoza; el coronel de la sección d’aviones europeos Ignacio Isusi Nieto; y el representante del Centru pal Desenvolvimientu Tecnolóxicu Industrial (CDTI), Raúl García Esparza, qu’esplicó’l Programa estratéxicu de calter dual pal área de la seguranza y la defensa. Na clausura, el director xeneral d’Innovación, Iván Aitor Lucas, animó a l’agrupación empresarial a trabayar en comuña en proyectos pa concurrir a convocatories nacionales y europees.