• La Conseyería de Cultura, Política Llingüística y Turismu convoca les subvenciones, destinaes a asociaciones, profesionales de les artes escéniques y intervenciones arqueolóxiques

La Conseyería de Cultura, Política Llingüística y Turismu publicó la convocatoria de trés llinies d’ayudes p’anguaño, dotaes con 240.000 euros y destinaes a fomentar l’actividá cultural en dellos sectores. Los interesaos puen rexistrar les solicitúes dende güei y hasta’l 27 de mayu viniente, nel casu de les destinaes a fundaciones, particulares y asociaciones que desenvuelvan actividaes culturales d’interés rexonal y a les empreses y autónomos dedicaos a la producción teatral. El plazu pa presentar proyectos a la llinia empobinada a financiar intervenciones arqueolóxiques acaba’l 13 de mayu.

Les trés convocatories impulsaes pola Dirección Xeneral de Cultura y Patrimoniu son estes:

• Proyectos d’actividaes culturales y acciones de formación y movilidá entamaos por particulares, fundaciones y asociaciones. Ta dotada con 100.000 euros y tien por oxetu apoyar la organización d’actividaes culturales que tengan interés rexonal. Tamién va destinada a facilitar acciones de formación y movilidá, cola mira de dar apoyu a xires d’espectáculos d’artes escéniques y musicales y fomentar la difusión de les artes plástiques y audiovisuales al traviés de proyectos espositivos y de l’asistencia a feries, festivales y eventos de promoción o comercialización fuera del Principáu. Amás, les bases recueyen l’apoyu a la organización de cursos y acciones formatives en cualquier disciplina artística. El plazu de solicitúes va tar abiertu hasta’l 27 de mayu.
• Proyectos de producción d’artes escéniques o acondicionamientu de montaxes. La llinia de subvenciones aumenta la dotación hasta los 100.000 euros y busca sofitar a autónomos y empreses de les artes escéniques na creación de montaxes nuevos y espectáculos. El plazu de solicitúes va tar abiertu hasta’l 27 de mayu.
• Proyectos y actuaciones arqueolóxiques. Cola mira d’apoyar la financiación de proyectos y actuaciones arqueolóxiques sobre bienes del patrimoniu cultural asturianu, el Principáu llanza una llinia d’ayudes dotada con 40.000 euros. El plazu de solicitúes va tar abiertu hasta’l 13 de mayu.

Enllaces a les convocatories

Proyectos d’actividaes culturales d’interés rexonal entamaos por particulares, fundaciones y asociaciones:

http://sede.Asturies.es/bopa/2022/04/28/2022-02927.pdf

Proyectos de producción d’artes escéniques o acondicionamientu de montaxes:

http://sede.Asturies.es/bopa/2022/04/28/2022-02930.pdf

Proyectos y actuaciones arqueolóxiques:

http://sede.Asturies.es/bopa/2022/04/28/2022-02900.pdf​​​​