Categories Navigation

Categories Navigation

Coxersa rinde homenaxe a los representantes asturianos nos Premios Europeos de Prevención del Residuu

29/04/2022

la viceconsejera de Medio Ambiente y Cambio Climático, Nieves Roqueñí (izqda.). y la gerente de Cogersa, Paz Orviz

  • La Juguetería solidaria, de la Fundación Social Mar de Niebla, figura ente los 16 finalistes a nivel comunitariu
  • La viceconseyera de Mediu Ambiente sorraya que’l consumu responsable ye’l primer pasu camín de la economía circular

El Consorciu pa la Xestión del Residuu Sólido d’Asturies (Coxersa) rindió homenaxe güei a los cinco proyectos que van representar a Asturies nos premios de prevención que van fallase en Bruseles el 9 de xunu. La propuesta presentada pola Fundación Social Mar de Niebla, de recoyida y donación solidaria de xuguetes usaos, yá ta ente los dieciséis finalistes.

Xunto a esta iniciativa, Coxersa propunxo como proyectos más señalaos de la comunidá los presentaos pol Conceyu de Cangues d’Onís y la so escuela municipal de música; l’IES de La Fresnera, de Siero; la Escuela Pública Begoña, de Xixón; la empresa EDP España y una persona particular de Mieres, Beatriz Rodríguez. Toes son acciones de consumu responsable, reciclaxe de productos y mengua de refugaya que s’entamaron ente’l 20 y el 28 de payares, na XIII edición de la Selmana Europea de la Prevención de Residuu.

La viceconseyera de Mediu Ambiente y Cambéu Climáticu, Nieves Roqueñí, que presidió la gala xunto a la xerente de Coxersa, Paz Orviz, destacó que “los proyectos escoyíos son una bona muestra del esfuerciu que ta faciéndose por parte d’alministraciones, entidaes, empreses y ciudadanía, trabayando nuna manera nueva de fabricar y consumir, pa modificar la economía llinial camín de la economía circular nueva”.

Roqueñí sorrayó que la Estratexa d’Economía Circular del Principáu va presentase enantes de qu’acabe esti añu y destacó’l papel protagonista que va tener Coxersa, “como locomotor históricu del sector de tratamientu del residuu n’Asturies, pieza clave pola so esperiencia y saber facer tocante al reciclaxe y valorización del residuu de les cases, de la industria o de la construcción”.

El consorciu promueve y coordina dende va doce años la Selmana Europea de la Prevención de Residuu n’Asturies. En total, entamáronse 1.607 acciones gracies a la implicación efectiva de 1.217 entidaes y organizaciones de toa clas. Nel 2021 pudo convocase a 142 colectivos, qu’impulsaron 221 actividaes.

A lo llargo d’estos años, once acciones llegaron a la fase de clasificación, como semifinalistes, onde ta anguaño’l proyectu Juguetería solidaria, de Mar de Niebla. En trés ocasiones consiguió algamar el gallardón máximu: dos na categoría d’empresa, coles propuestes de llucha escontra l’espilfarru d’alimentos y de prevención d’envases de Capsa (nel 2019 y 2020, respectivamente), y una na categoría d’asociaciones, cola campaña de recoyida de basura nes sableres The language of the Sea, impulsada en delles rexones del norte d’España pola patronal de centros d’idiomes.

Amás, nel 2012 el Conservatoriu Profesional de Música d’Uviéu algamó una mención especial del xuráu, na categoría d’entidaes educatives, pola so Orquesta de papel.


Audios de la viceconsejera de Medio Ambiente y Cambio Climático, Nieves Roqueñí (mp3 2090 Kb)​​​​​​​