Categories Navigation

Categories Navigation

La Unidá de Rehabilitación Cardiaca del HUCA algama’l certificáu d’escelencia de la Sociedá Española de Cardioloxía

05/05/2022
  • El serviciu fomenta los cambeos nel estilu de vida y el control de los factores de riesgu nos pacientes que sufrieron un eventu coronariu
  • L’equipu multidisciplinar, formáu por cardiólogu, médicu rehabilitador, enfermera, fisioterapeuta y psicólogu, atiende 120 pacientes al añu

 
La Unidá de Rehabilitación Cardiaca del Hospital Universitariu Central d’Asturies (HUCA), cabecera del área sanitaria IV (Uviéu) y la única del Principáu, algamó’l certificáu d’acreitación d’escelencia SEC-Escelente como unidá especializada en rehabilitación y nel manexu del procedimientu Rehabilitación que concede la Sociedá Española de Cardioloxía (SEC).
 
La rehabilitación cardiaca (indicación IA de les guíes de práctica clínica) ye una estratexa de prevención y tratamientu multifactorial de la enfermedá cardiovascular que busca ameyorar la salú física y psíquica del paciente y facilitar la so integración social y llaboral, lo qu’ayuda a amenorgar la mortalidá por esta causa y los reingresos hospitalarios.
 
El serviciu, que s’implantó nel 2016 y atiende 120 pacientes al añu, centra’l llabor na prevención cardiovascular de pacientes que sufrieron un eventu coronariu (anxina, infartu o ciruxía) pa que cambien l’estilu de vida, controlen los factores de riesgu cardiovascular y ameyoren el cumplimientu de los tratamientos y les recomendaciones médiques pa evitar episodios nuevos.
 
L’equipu multidisciplinar de la unidá del HUCA compónse d’un cardiólogu, médicu rehabilitador, enfermera, fisioterapeuta y psicólogu. El programa de rehabilitación estrémase en trés fases:

  • Fase I. Correspuéndese col ingresu hospitalariu, onde se promueve la movilización precoz (a les 24-48 hores de ser internáu), empiecen a facese exercicios físicos cenciellos, enséñase a identificar y manexar el dolor coronariu y danse recomendaciones pensando nel alta: conseyos dietéticos o cese definitivu del tabacu, ente otros.
  • Fase II. Empieza tres del alta hospitalaria, nel ximnasiu de rehabilitación. Faise una evaluación individualizada del paciente con una prueba d’esfuerciu que fai posible axustar un programa d’exerciciu físicu supervisáu. A esti, súmense alcuentros educativos, tanto pa pacientes como familiares, empobinaos al control de la dieta, diabetes, lípidos o deshabituación tabáquica. El programa dura alredor d’un mes, con trés sesiones selmanales y con monitorización telemétrica. Nesta fase complétase’l programa cola detección y intervención sobre alteraciones psicolóxiques, bien con terapia individual o grupal o con sesiones de relaxación.
  • Fase III. Va siguir a lo llargo de la vida del paciente, poniendo en práctica tolo deprendío nel programa y onde ye fundamental la práctica diaria d’exerciciu físicu y el cumplimientu terapéuticu.