Categories Navigation

Categories Navigation

El plan de sostenibilidá turística d’Ozcos-Eo, dotáu con 3,5 millones, va ampliar la rede de rutes de cicloturismu y senderismu na zona

05/05/2022
  • L’actuación, que tien financiación del programa européu Next Generation, va facer posible habilitar una playa fluvial en San Tiso d’Abres, crear un cinturón verde en Castropol y ameyorar los accesos a Os Teixóis, en Taramundi, ente otres midíes
  • El presidente y la conseyera de Cultura visitaron en San Tiso la ruta vieya del ferrocarril, con un trazáu de 14 quilómetros que va acondicionase como reclamu pa vecinos y visitantes

 
El plan de sostenibilidá turística d’Ozcos-Eo, dotáu con 3,5 millones del programa européu Next Generation pa los 7 conceyos de la zona, va ampliar la rede de rutes de senderismu y cicloturismu en tola contorna. El proyectu incluye la execución hasta’l 2024 d’once actuaciones empobinaes a aprovechar los recursos naturales y patrimoniales de los conceyos de Castropol, Samartín d’Ozcos, San Tiso d’Abres, Santalla d’Ozcos, Taramundi, A Veiga y Vilanova d’Ozcos, con un modelu de desenvolvimientu sostenible dende’l puntu de vista ambiental y económicu.
 
El presidente del Principáu, Adrián Barbón, y la conseyera de Cultura, Política Llingüística y Turismu, Berta Piñán, visitaron güei en San Tiso d’Abres ún de los tramos de la ruta del ferrocarril mineru vieyu que xuntaba la localidá con Ribadeo, con un trazáu de 14 quilómetros que va acondicionase nel marcu d’esti plan turísticu p’habilitar una sienda que valga de reclamu pa vecinos y visitantes.
 
El proyectu pa la comarca contempla una inversión de 1,4 millones pa la consolidación del senderismu y el cicloturismu como elementos de desenvolvimientu económicu. Estos fondos van facilitar la creación d’un cinturón verde y marítimu en Castropol, dende la playa de Penarronda hasta A Punta da Cabana, de 20,34 quilómetros de percorríu. Tamién van dexar acondicionar la sienda fluvial paralela al ríu Eo y habilitar una sablera fluvial al principiu de la mesma, en San Tiso d’Abres. Igualmente, va ameyorase la señalización de les rutes en tolos conceyos.
 
Amás, va crease una ruta peatonal nueva n’A Veiga, ente El Noveledo y Las Clavelinas, que va facer posible xuntar la capital del conceyu cola localidá de Piantón, sumando asina un recursu turísticu nuevu que va ameyorar la calidá de vida de la población.
 
L’apueste pol ecoturismu destaca ente la batería d’iniciatives previstes nel plan, qu’incluyen l’acondicionamientu de delles árees recreatives, con una inversión global de 87.000 euros; el soterramientu d’una llinia eléctrica y l’ameyoramientu d’accesos a La Rectoral, en Taramundi. Nesti mesmu conceyu van destinase otros 104.700 euros a aumentar l’accesibilidá al conxuntu etnográficu d’Os Teixois.
 
Otra de les exes principales d’actuación ye la dixitalización del sector turísticu, que dispón d’un presupuestu de 400.000 euros pal desenvolvimientu d’un portal web, una aplicación con audioguíes y ferramientes dixitales específiques pa enclaves como’l monesteriu de Vilanova d’Ozcos, pal que tamién va redactase un proyectu de musealización, o’l palaciu de Mon, en Samartín d’Ozcos, onde van reacondicionase pa usu turísticu les mines Carmina y Pena Teixeira usando enerxía renovable. Pela so parte, en Santalla va recuperase’l molín d’A Ponte.
 
El plan de sostenibilidá de la zona, onde trabayen 195 empreses lligaes al sector turísticu, destina 205.000 euros a formación, dinamización económica y al fomentu de productos turísticos rellacionaos colos recursos que yá existen nos ámbitos deportivu, gastronómicu y artesanal.


Audios del presidente del Principado Adrián Barbón, sobre su visita al concejo (mp3 3077 Kb)