Categories Navigation

Categories Navigation

Educación presenta unos currículos d’Infantil y Primaria flexibles, onde gana pesu la enseñanza d’Inglés y el trabayu por proyectos

05/05/2022

: la consejera de Educación, Lydia Espina, y el director general de Ordenación, Evaluación y Equidad Educativa, David Artime

  • El decretu d’Infantil garantiza la continuidá del deprendimientu de 0 a 6 años, al xuntar los dos ciclos​​​​
  • En Primaria, déxase a los centros organizase por ámbitos de conocimientu y foméntase la salú, con más Educación Física
  • La repetición va ser escepcional y han adoptase midíes de refuerciu pal alumnáu con dificultaes de progresu​​​​​​​
  • La conseyera, Lydia Espina, destaca l’autonomía que se concede a los docentes p’afondar nos conteníos y reforciar la formación por competencies

 La Conseyería d’Educación presentó’l desenvolvimientu curricular d’Infantil y Primaria adaptáu a la LOMLOE, que va empezar a aplicase n’Asturies a partir del cursu que vien, y onde gana pesu la enseñanza del Inglés y el trabayu por proyectos. Los currículos, qu’actualmente tán en tramitación, básense nel desenvolvimientu fechu pol Ministeriu d’Educación y Formación Profesional y faen usu del marxe autonómicu que dexa la llei. Los currículos asturianos apuesten por un enfoque tresversal de la coeducación. A partir de Primaria, los centros van poder agrupar les materies por ámbitos, en cuenta d’impartiles una a una, y han dedicar, lo menos, el 20 % del horariu al trabayu por proyectos. L’área nueva d’Educación en Valores Cívicos y Éticos va impartise en 6.u y va promocionase la salú con un aumentu de la Educación Física. 

La conseyera d’Educación, Lydia Espina, y el director xeneral d’Ordenación, Evaluación y Equidá Educativa, David Artime, destacaron que se trata d’un currículu más flexible y permeable, onde se da autonomía a los docentes p’afondar nos conteníos. Tanto les árees como la organización propuestes tán empobinaes a ameyorar el deprendimientu por competencies, ún de los oxetivos fundamentales de la LOMLOE.

Espina agradeció’l llabor de los grupos de trabayu que, dende’l cursu pasáu y al empar que’l trabayu del Ministeriu, fixeron propuestes p’articular los decretos d’Asturies. En caúna de les árees de Primaria hubo equipos de 3 y 4 persones. Pa Infantil organizóse namás qu’ún, pero con más participación.  

 

Currículu d’Infantil

El currículu nuevu d’Educación Infantil incluye pela primer vez los dos ciclos: de 0 a 3 y de 3 a 6 años, cola mira de sintonizar el deprendimientu, garantizar la continuidá y da-y identidá propia. Caltiénse la distribución de los conteníos en trés árees, que conserven la esencia, pero que modifiquen la denominación y pasen a llamase Medría n’Harmonía, Descubrimientu y Esploración del Entornu, y Comunicación y Representación de la Realidá.

El decretu indica que la enseñanza tien qu’ayudar a que l’alumnáu algame autonomía personal, y a qu’ellabore una imaxe de sí mesmo positiva, equilibrada y igualitaria, llibre d’estereotipos sexistes y discriminatorios. Tamién tien que deprender el movimientu, la comunicación, el llinguaxe y les pautes elementales de convivencia y rellación social. La coeducación y la igualdá son dos exes tresversales esplícites.

El currículu destaca especialmente la inclusión educativa cola aplicación de los principios del modelu Diseñu Universal pal Deprendimientu (DUD), centráu na atención individualizada, afaciéndose a les característiques, necesidaes y intereses de cada estudiante, y amenorgando les barreres físiques, cognitives o culturales.

Educación va potenciar la enseñanza d’Inglés dende Infantil, cola so implantación, pela primer vez, pal alumnáu de 3 años, lo qu’aumenta la carga horaria total de la etapa. Va tener un mínimu de trés y un máximu de cuatro hores selmanales en tola etapa, preferiblemente en sesiones de 30 o 45 minutos. Los centros han fixar, lo menos, una clas a la selmana nel primer cursu, pal alumnáu de trés años. Amás, va dase prioridá, con una perspectiva lúdica, al deprendimientu de les destreces de la comunicación oral.

Otra seña d’identidá del currículu va ser el refuerciu de la enseñanza de la cultura asturiana dende Infantil, introduciendo elementos tresversales que tengan en cuenta’l contestu onde ta inmersu l’alumnáu. La idea esencial consiste en tresmitir dende edaes tempranes conteníos de sensibilización del entornu escolar.

 

Currículu de Primaria

El currículu nuevu apuesta pola tresversalidá de conteníos y avanza nel deprendimientu por competencies. Afítense 8 competencies clave pa la etapa, en comunicación llingüística, plurillingüe, matemática y ciencia; tecnoloxía y inxeniería; dixital; personal, social y de deprender a deprender; ciudadana, y entamadora y n’espresiones culturales. Les asignatures pasen a llamase árees y el decretu establez 8: Ciencies de la Naturaleza y Ciencies Sociales, Educación Física, Educación Artística, Llingua Castellana y Lliteratura, Llingua Estranxera y Matemátiques. Añadese pela primer vez Educación en Valores Cívicos y Éticos, que n’Asturies va cursase en 6.u, con dos sesiones selmanales de 45 minutos. La Conseyería decidió implantala nel últimu cursu de Primaria, al considerar que se trata d’un añu clave pa la transición a Secundaria y más aconseyable dende’l puntu de vista pedagóxicu. Dientro de les competencies autonómiques caltiénse’l pesu de Llingua Asturiana y Lliteratura o Cultura Asturiana.

De nueves, el deprendimientu del Inglés ye ún de los apuestes principales. Esta área medra nuna hora selmanal al respective del horariu actual. Otra manera, la intención de promocionar la salú queda reflexada na medría de media hora selmanal n’Educación Física.

Relixón caltién l’horariu, pero les sos calificaciones nun van cuntar nes convocatories que se resuelvan cola nota del espediente académicu y va dexar de tener asignatura espeyu. Quier dicise, va haber una alternativa, pero tampoco va ser evaluable.

La Conseyería decidió potenciar el trabayu por proyectos, pa fomentar la tresversalidá y el desenvolvimientu de competencies. Esto implica que tolos centros han dedicar, lo menos, el 20 % del horariu al desenvolvimientu de proyectos integraos. Fixóse esi mínimu porque se correspuende con un día llectivu y pue facilitar la organización. Esta iniciativa ha incluyise na programación xeneral anual.

Tamién s’abre la posibilidá d’organizar la enseñanza por ámbitos de conocimientu, col agrupamientu de delles árees, tanto al tiempu d’impartiles como na calificación final. Habría, polo tanto, una nota namás. Un exemplu d’agrupamientu ye’l científico-tecnolóxicu, formáu por Ciencies Naturales y Matemátiques. Los centros tamién puen optar por un modelu mistu, impartiendo parte del currículu por árees y otra por ámbitos.

Los seis cursos de Primaria van organizase en ciclos de dos años. La promoción va ser automática nos cursos impares y va decidise por consensu del equipu de docentes nos pares. Si nun hai alcuerdu, va aplicase la mayoría simple, col votu de calidá del tutor. La repetición va siguir siendo una midida escepcional (namás una vez en tola etapa). Cuando’l progresu del alumnu o la alumna nun seya’l precisu, van establecese midíes de refuerciu. Desapaecen les calificaciones numbériques y gana pesu la evaluación cualitativa y personalizada.​​​​



Horario infantil (pdf 475 Kb)​​​​​​​