Categories Navigation

Categories Navigation

Les meyores cocineres de Llatinoamérica y África van visitar Asturies como ponentes de FéminAs

05/05/2022
  • Destaquen nel cartel la brasileña Manu Buffara, referente de la gastronomía llatinoamericana, y Nadjat Kaanache, rexente del meyor restaurante africanu
  • La portuguesa Noelia Jerónimo, la italiana Cristina Bowerman, la chef nómada Fatmata Binta (Sierra Lleona) y les picanteres d’Arequipa van cocinar xunto a les guisanderes en xintes y cenes inédites a cuatro manes

El segundu Congresu de Gastronomía, Muyer y Mediu Rural FéminAs va volver homenaxar a les muyeres lligaes al mundu de la cocina del 16 al 18 de mayu, nuna edición que va destacar pol so calter internacional marcáu. Una decena de ponentes procedentes de Llatinoamérica y África, consideraes referencies de la cocina sostenible, van visitar el suroccidente asturianu pa compartir les sos esperiencies.

La segunda edición va axuntar un cartel importante de ponentes, ente les que destaca la brasileña Manu Buffara, chef del restaurante Manu (Curitiba), una de les figures más importantes de la gastronomía llatinoamericana y activista comprometida col entornu. El so llabor foi a recuperar formes de sema tradicional; inculcar técniques de pesca, caza y horticultura sostenibles; esparder práctiques nutricionales y de control del esperdiciu; y defender la biodiversidá al traviés d’un llabor pedagóxicu constante. 

En FéminAs va tar tamién una de les grandes trunfadores de la última edición de The Best Chef celebrada n’Ámsterdam: Fatmata Binta (Fulani Test Kitchen, Accra, Ghana). Nacida y criada en Freetown, Sierra Lleona, la cocinera nómada lleva a los sos platos la tradición de los fulani, la tribu nómada más grande del mundu, compuesta por pastores espardíos per África occidental y de la que formen parte más de 20 millones de persones. Binta defende que la comida ye’l llinguaxe que ruempe barreres, el conector universal, y que se pue deprender muncho al observar los vezos y la cultura de los antepasaos. 

Otru de los nomes relevantes del programa ye la peruana Mónica Huerta (restaurante La Nueva Palomino, Arequipa), miembru de la Sociedá Picantera d’Arequipa, un colectivu que foi quién a que la so cocina encarnare la imaxe de la tradición y la resistencia nunos comedores populares exemplares que definen la naturaleza de la cocina arequipeña. Medraron lluchando dende la humildá y la falta d’apoyos y deprendieron a dir p’alantre pa convertise na diferencia nel paisaxe culinariu peruanu. Por facer de la picantería arequipeña una espresión singular de la cultura culinaria peruana, van recoyer nesta edición el II Premiu Guardianes de la Tradición.

Nadjat Kaanache, del restaurante Nur, en Fez, ye otra de les figures renomaes nel cartel del congresu. La gran embaxadora de la gastronomía marroquina rexenta’l meyor restaurante d’África. A base de trabayu y sacrificiu, Kaanache foi quién a apaecer nes llistes de chefs más reconocíes del mundu cola so cocina de fusión mestiza.

Tamién van participar la cocinera portuguesa Noélia Jerónimo (Restaurante Noélia & Jerónimo. Cabanas de Tavira, Portugal), embaxadora auténtica de la gastronomía portuguesa mediterránea nel Algarve; y una de les cocineres italianes más actives y con más personalidá, Cristina Bowerman, la única muyer con estrella Michelin en Roma, en Glass Hostaria, onde amás lluz la estrella verde pol so apueste pola sostenibilidá alimentaria, compromisu que la llevó l’añu pasáu a participar nel Foru Económicu Mundial de Davos. Nel cartel tán tamién Carito Lourenço, la primer chef arxentina n’algamar una estrella Michelin xunto al so maríu, Germán Carrizo, con quien rexenta’l restaurante Fierro, en Valencia; y la chef Carolina Sánchez (Íkaro, La Rioxa), la primer ecuatoriana n’algamar una estrella Michelin nel 2019, qu’exerce de xuráu na edición de Masterchef del so país.

Dalgunes de les guisanderes más renomaes del suroccidente asturianu, como Mayte Álvarez y Blanca Menéndez, de Casa Lula, o Ángela Pérez, de Casa Emburria, van tener la oportunidá de cocinar con estes figures internacionales nos sos propios restaurantes, en xintes y cenes inédites a seis y ocho manes.

Gastronomía, muyer y ruralidá nueva

L’oxetivu de FéminAs, entamáu por Vocento Gastronomía y promovíu pola Conseyería de Cultura, Política Llingüística y Turismu, ye defender actividaes que repercutan na visibilidá de les muyeres na hostelería y el sector primariu, amás de na concienciación social pa la defensa de la sostenibilidá y les comunidaes rurales.

Esta edición del congresu —que tamién va cuntar con referentes nacionales, como Carme Ruscalleda, Elena Arzak o Fina Puigdevall— va percorrer parte del suroccidente asturianu, un territoriu que presenta tamién bayura d’exemplos de la protección cultural gastronómica qu’algamaron les muyeres n’Asturies, con determín y capacidá de trabayu, al mandu de cases de comíes propies. El Parador de Courias, en Cangas del Narcea, va ser la sede principal de FéminAs, anque les xornaes tamién van desenvolvese n’otros sitios de Tinéu y Ayande, dientro del programa d’actividaes. 

El congresu va tar abiertu al públicu hasta completar aforu a lo llargo de les xornaes del llunes y martes, y tamién va poder siguise de manera telemática al traviés del portal www.gastrofeminas.com.

Cocina de Paisaxe

La integración del paisaxe, los productos locales y el talentu culinariu nuna mesma identidá ye la ventaya competitiva que defende l’eslogan Cocina de Paisaxe, col qu’Asturies promociónase como destín gastronómicu. L’apoyu a FéminAs y l’asistencia a salones especializaos, como Madrid Fusión y Alimentaria, son dalgunes de les acciones destacaes nesti plan, puestu en marcha pola Viceconseyería de Turismu na seronda del 2021.