Categories Navigation

Categories Navigation

L’Axencia Española de Seguranza Alimentaria premia’l llabor de los centros de formación pal consumu na promoción d’una alimentación saludable

05/05/2022
  • Más de mediu millón de persones participaron nes actividaes desenvueltes nos últimos 24 años pola rede asturiana, pionera n’Europa y un referente en formación

L’Axencia Española de Seguranza Alimentaria y Nutrición (Aesan) del Ministeriu de Consumu reconoció’l llabor de la Rede de Centros de Formación pal Consumu del Principáu col Premiu Estratexa NAOS a la promoción d’una alimentación saludable nel ámbitu familiar y comunitariu. El gallardón, que va entregase en payares, premia’l trabayu desenvueltu a lo llargo de cuasi 25 años por esti organismu, pioneru n’Europa y un referente nacional n’educación y concienciación sobre’l consumu consciente, responsable, solidariu y sostenible.
 
El director de l’Axencia de Seguranza Alimentaria, Sanidá Ambiental y Consumu, José Ignacio Altolaguirre, destacó la importancia d’esti reconocimientu pa esta entidá, pola so trayectoria tan llarga con escolinos y colectivos vulnerables, nuna visita al centru de formación de Llugones, en Siero.
 
La rede (www.cfc-asturias.es) empezó a funcionar en 1998, col apoyu de los Conceyos de Tinéu, Samartín del Rei Aurelio, Siero y Ribeseya. Dende entós, más de mediu millón de persones asistieron a dalgún de los talleres. Actualmente, ufierten 126 actividaes rellacionaes cola educación pal consumu.
 
A esta edición del premiu Estratexa NAOS presentáronse 46 proyectos nes 8 modalidaes existentes, de los que resultaron finalistes 25, ente ellos, la rede asturiana, que se caracteriza pola so collaboración y sinerxa con otres instituciones de calter educativu y social de la comunidá. Nel 2018, algamó’l primer accésit d’esta categoría.
 
Los proyectos Dieta mediterránea arriquecida pa facer frente a la obesidá xuvenil, de la Fundació Eurectat (Cataluña), y Familia y salú. Padres y pediatres al cuidáu de l’alimentación de la infancia y l’adolescencia cola web familia y salú, de l’Asociación Española de Pediatría d’Atención Primaria, quedaron finalistes nesta modalidá.​​​​​