•  L'Executivu solicita una xunta urxente a la compañía pa conocer los motivos y evitar que se consume la desinversión 
• Les conseyeríes d'Industria, Empléu y Promoción Económica y de Mediu Rural y Cohesión Territorial trabayen de manera coordinada pa tratar de caltener l'actividá y l'empléu

El Gobiernu d'Asturies manifiesta la so sorpresa énte l'anunciu de la multinacional Danone de cerrar la factoría de Salas, localidá onde lleva implantada 41 años y na que da empléu a 80 persones.

L'Executivu, que tuvo conocencia de la noticia al tiempu que los representantes de los trabayadores, muestra la so sorpresa énte una desinversión qu'afecta a una compañía del sector lláctéu, que salió favorecíu pola pandemia sanitaria.

Énte esti fechu, el Principáu yá solicitó una xunta urxente cola dirección de la compañía pa pescanciar información sobre los motivos que llevaron a Danone a anunciar el zarru de la fábrica.

Les conseyeríes d'Industria, Empléu y Promoción Económica y de Mediu Rural y Cohesión Territorial trabayen de manera coordinada p'analizar l'algame del anunciu de la empresa y tratar de revertir la so decisión, coles mires de caltener l'actividá industrial y l'empléu.