El vicepresidente destaca que la xestión consorciada va facilitar qu’Asturies algame los oxetivos de la llei estatal nueva del residuu
- Juan Cofiño asegura que la reforma de les tases y ordenances municipales, les recoyíes separaes futures y la supresión del vertederu suponen un “desafíu pergrande”
- El conseyeru de Mediu Ambiente inauguró güei una xornada pa informar a los conceyos sobre les afecciones de la llexislación nueva del Gobiernu d’España pa una economía circular
El vicepresidente y conseyeru d’Alministración Autonómica, Mediu Ambiente y Cambéu Climáticu, Juan Cofiño, afirmó güei que la xestión consorciada va facilitar qu’Asturies algame los oxetivos fixaos na Llei 7/2022, del 8 d’abril, del Residuu y Suelu Contaminao pa una Economía Circular. Al so paecer, la llexislación estatal nueva supón “un desafíu pergrande” pa los Conceyos y pal Consorciu pa la Xestión del Residuu Sólido (Coxersa), porque “implica una tresformación radical del modelu vixente” y va obligar a “facer cambeos organizativos importantes”. Sicasí, puntualizó que’l modelu de gobernanza consorciada “ye una gran fortaleza de la comunidá”.
Cofiño, qu’inauguró n’Uviéu una xornada técnica entamada por Coxersa y la Federación Asturiana de Conceyos (FACC), reconoció qu’Asturies “tien per delantre un camín llargu p’algamar nel 2030 la tasa de reciclaxe del 60 % qu’esixe la Unión Europea”. Dende’l so puntu de vista, les recoyíes separaes nueves qu’obligatoriamente van tener qu’implantar los conceyos nos años vinientes y los instrumentos económicos que prevé la llei nueva “van convertise en ferramientes imprescindibles”.
Na so intervención, destacó la singularidá del centru de tratamientu del residuu qu’esplota Coxersa, con 400 hectárees nel corazón d’Asturies que nos años vinientes van acoyer instalaciones nueves pal aprovechamientu del residuu y la fabricación de materiales y productos enerxéticos de valor añadíu altu, como biometanu o otres clases de gas renovable, biofertilizante o biocarbón.
Tamién mentó la capacidá financiera del consorciu pa facer inversiones “gracies a cuatro décades de xestión eficiente, d’aforros derivaos de la integración de servicios y del aprovechamientu de les economíes d’escala de la xestión mancomunada”.
Otra manera, remarcó que Coxersa tien el preciu de xestión de la fracción restu más baratu d’España, con 25 euros por tonelada, frente a una media de 100 euros nes comunidaes que faen un tratamientu previu y clasificación de la bolsa negra. Amás, recordó qu’Asturies va disponer a partir del 2023 d’una instalación que va llevar a cabu esti procesu, con una inversión prevista de 60 millones, y que tien les obres avanzando a bon ritmu.
Los tratamientos nuevos de la basura, amás de la entrada en vigor del impuestu al depósitu en vertederu’l 1 de xineru del 2023 “van suponer inevitablemente un aumentu de los costos de xestión del residuu municipal”, reconoció Cofiño, al empar que recordó’l requerimientu llegal nuevu a los Conceyos pa qu’adapten les tases y ordenances. Nesti sentíu, aseguró que los Conceyos van tener sofitu financieru pa facer estos cambeos y refirióse a los 4,6 millones aprobaos pol Conseyu de Gobiernu’l vienres pasáu pa la convocatoria d’ayudes destinaes a proyectos d’entidaes locales empobinaos a implantar o ameyorar la recoyida separada del biorresiduu, que van poder tener una subvención d’hasta’l 90 %.
Na inauguración de la xornada sobre la llei estatal nueva intervieno tamién la presidenta de la FACC y alcaldesa d’El Franco, Cecilia Pérez. Otramiente, la ponencia principal fíxola Luis Enrique Mecati, subdirector d’Economía Circular, Salú y Biodiversidá de la Federación Española de Conceyos y Provincies (FECP), que centró la so intervención nes implicaciones que la norma nueva tien pa la xestión del serviciu municipal del residuu. Nel coloquiu posterior participaron la xerente de Coxersa, Paz Orviz; l’alcalde d’Illas, Alberto Tirador; el xerente de la Empresa Municipal de Servicios de Mediu Ambiente Urbanu de Xixón (Emulsa), Alfonso Baragaño; y el xefe de Servicios Básicos del Conceyu d’Uviéu, Adolfo García.
